Уйғур һәрикити тәшкилати хитайниң б д т да турушлуқ әлчисиниң баянатини әйблиди

Мухбиримиз җәвлан
2021-01-26
Share

Уйғур һәрикити тәшкилати 26-январ өз тор бетидә ахбарат елан қилип, хитайниң бирләшкән дөләтләр тәшкилатида турушлуқ әлчисиниң ирқий қирғинчилиқни хатириләш мунасивити билән тиветтерда елан қилған баянатини әйблиди.

Хитай әлчиси тиветтерда ошвитс (Auschwitz) лагери азад қилинғанлиқиниң 76 йиллиқини тәбриклигән вә "тарихни инкар қилғили болмайду, тарихни бурмилиғили болмайду. Тарихни унтуп қалғили болмайду. Тарихтики улуғ һәқиқәт бизгә шуни дәйдуки, инсанийәт һәммидин ғалип келиду, адаләт һәммидин ғалиб келиду, тинчлиқ һәммидин ғалиб келиду" дегән.

Уйғур һәрикити тәшкилатиниң билдүрүшичә, бу хитай әлчиниң кейинки сөзлири хата әмәс, әмма хитайни һәқлиқ көрситиш үчүн у сөзләрни сүйистемал қилған. Ирқий қирғинчилиқ йүргүзүватқан хитай һөкүмитиниң адаләт, һәқиқәт үстидә сөзләйдиған салаһийити йоқ. Әгәр сөзлисә пәқәт көз боямчилиқ қилиш үчүн сөзләватқан болиду. Шуңа бу баянаттики номуссизлиқ вә сахтилиқни әйбләш керәк.

Уйғур һәрикити тәшкилатиниң башлиқи рошән аббас мундақ дәйду: "мени һәйран қалдурғини шуки, бу хәлқаралиқ җинайәтчиләр бизниң әркин пикир сәһнимиздин пайдилинип ялғанчилиқ қилип, өзлириниң ирқий қирғинчилиқ җинайитигә мәдәт бериватиду. Әмма кишилик һоқуқ паалийәтчилири бу сәһнидә һуҗум вә төһмәткә учраватиду".

Рошән аббас ханимниң билдүрүшичә, у гәрчә америка пуқраси болсиму тиветтерниң қоғдишиға еришәлмигән. Униңға тиветтирда һуҗум қилған хитай ташқи ишлар баянатчиси җав лиҗийән, "йәршари вақит гезити" қатарлиқлар һечқандақ чәкләнмигән болуп, улар һазирму тиветтерда актип паалийәт қилмақтикән. Тиветтер қатарлиқ иҗтимаий алақә торлири кишиләргә өчмәнлик вә хитай милләтчилики идийәси тарқитиватқан шу рәзил күчләрни чәклиши керәк икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт