Uyghur herikiti teshkilati xitayning b d t da turushluq elchisining bayanatini eyblidi

Uyghur herikiti teshkilati 26-yanwar öz tor bétide axbarat élan qilip, xitayning birleshken döletler teshkilatida turushluq elchisining irqiy qirghinchiliqni xatirilesh munasiwiti bilen tiwéttérda élan qilghan bayanatini eyblidi.

Xitay elchisi tiwéttérda oshwits (Auschwitz) lagéri azad qilin'ghanliqining 76 yilliqini tebrikligen we "Tarixni inkar qilghili bolmaydu, tarixni burmilighili bolmaydu. Tarixni untup qalghili bolmaydu. Tarixtiki ulugh heqiqet bizge shuni deyduki, insaniyet hemmidin ghalip kélidu, adalet hemmidin ghalib kélidu, tinchliq hemmidin ghalib kélidu" dégen.

Uyghur herikiti teshkilatining bildürüshiche, bu xitay elchining kéyinki sözliri xata emes, emma xitayni heqliq körsitish üchün u sözlerni süy'istémal qilghan. Irqiy qirghinchiliq yürgüzüwatqan xitay hökümitining adalet, heqiqet üstide sözleydighan salahiyiti yoq. Eger sözlise peqet köz boyamchiliq qilish üchün sözlewatqan bolidu. Shunga bu bayanattiki nomussizliq we saxtiliqni eyblesh kérek.

Uyghur herikiti teshkilatining bashliqi roshen abbas mundaq deydu: "Méni heyran qaldurghini shuki, bu xelq'araliq jinayetchiler bizning erkin pikir sehnimizdin paydilinip yalghanchiliq qilip, özlirining irqiy qirghinchiliq jinayitige medet bériwatidu. Emma kishilik hoquq pa'aliyetchiliri bu sehnide hujum we töhmetke uchrawatidu".

Roshen abbas xanimning bildürüshiche, u gerche amérika puqrasi bolsimu tiwéttérning qoghdishigha érishelmigen. Uninggha tiwéttirda hujum qilghan xitay tashqi ishlar bayanatchisi jaw lijiyen, "Yershari waqit géziti" qatarliqlar héchqandaq cheklenmigen bolup, ular hazirmu tiwéttérda aktip pa'aliyet qilmaqtiken. Tiwéttér qatarliq ijtima'iy alaqe torliri kishilerge öchmenlik we xitay milletchiliki idiyesi tarqitiwatqan shu rezil küchlerni cheklishi kérek iken.

Buni bésish arqiliq, pikringizni yézing

• Print
• Hembehr
• Ewetish

Barliq pikir - bayanlarni körüsh.

• Bügünki anglitish
• Ilgiriki anglitishlar