Wolkér türk: “B d t ning kishilik hoquq ishxanisi hemmila yerde bolushi lazim!”

Birleshken döletler teshkilati (b d t) kishilik hoquq kéngishining aliy komissari wolkér türk (Volker Türk) 24-may küni b d t ning jenwe shitabida chaqirilghan muxbirlarni kütüwélish yighinida échilish nutuqi sözlep, kishilik hoquq saheside saqliniwatqan mesililer toghrisida mexsus söz qilghan.

Ularning tor bétide élan qilin'ghan bu heqtiki melumatlarda körsitilishiche, wolkér türk “Dunya kishilik hoquq xitabnamisi” élan qilin'ghanliqining 75 yilliq xatiriside, izchil herqaysi hökümetlerni özliri imza qoyghan kishilik hoquq xitabnamisidiki maddilarni ijra qilishqa chaqirghan. Shuning bilen birge “Kishilik hoquq aliy kéngishi” qurulghanliqining 30 yilliq xatiriside dunyaning herqaysi jayliridiki ishxana sanining eslidiki ikki ishxanidin 94 ke yetkenlikini tilgha alghan. Emma bu heqtiki ehwallar toghrisida söz bolghanda, “Biz bu ishxanilarni téximu zor derijide kéngeytishke hemde buni emelge ashurushqa lazimliq mebleghge éhtiyajliq. Bizning nishanimiz dunyaning hemmila yéride kishilik hoquq ishxanisi tesis qilish” dégen.

Wolkér türk öz sözide dunyadiki kishilik hoquq depsendichiliki bilen shughulliniwatqan asasliq döletlerning hemmisini bir-birlep tilgha alghan bolsimu, emma nöwette qirghinchiliq qiliwatqan xitay hökümiti hemde ularning basturush obyékti boluwatqan Uyghurlar heqqide bir éghizmu söz qilmighan. Nöwette bu hal xitay hökümiti ghayet zor iqtisadiy küch serp qilish bedilige yillardin buyan dawam qiliwatqan “B d t ni kontrol qilish” herkitining biwaste netijisi, dep qariliwatqanliqi melum. B d t kishilik hoquq kéngishi ene shu teriqide xitayning “Yanchuqidiki oyunchuq” bolup qalghanliqtin, sabiq prézidént donald tramp dewride amérika hökümiti buninggha naraziliq bildürüp, özlirining kishilik hoquq kéngishidiki ezaliq salahiyitidin waz kechken idi.