Б д т ниң русийәлик әмәлдариниң уйғур райони зиярити әндишә қозғиди

Мухбиримиз әркин
2019-06-14
Елхәт
Пикир
Share
Принт

Б д т ниң «террорлуқ ишлири мәсилиси» гә мәсул русийәлик муавин баш катипи владимир иванович воронкофниң уйғур районида зиярәттә болуш пилани кишилик һоқуқ тәшкилатлири вә бәзи ғәрб һөкүмәтлиридә әндишә қозғиған.

Америкадики «ташқи сиясәт» журнилиниң 13‏-июн хәвәр қилишичә, кишилик һоқуқ тәшкилатлири вә бир қисим ғәрб һөкүмәтлири хитайниң воронкофниң зияритини өзиниң лагерлар һәққидики тәшвиқати үчүн пайдилинип кетишидин әндишә қилмақтикән. Воронкофниң бу һәптә ичидә уйғур районида зиярәттә болушни пиланлиғанлиқи, униңға хитай җамаәт хәвпсизлик министириниң һәмраһ болидиғанлиқи илгири сүрүлмәктә.

«Ташқи сиясәт» журнилиниң хәвиридә униң зиярити әмәлгә ашса, «у хитай һөкүмити бир милйондәк уйғурни лагерларда тутуп туруватқан мәзкур районни зиярәт қилған тунҗи юқири дәриҗилик б д т әмәлдари болуп қалиду» дейилгән. Лекин униң зияритини тәнқид қилғучилар, униң зиярити мәзкур районда уйғурларға қарши елип бериватқан һәрикәтләрни террорлуққа қарши тәдбир, дәп ақлаватқан хитайни қоллиғанлиқ болуп қалидиғанлиқини агаһландурмақта.

Кишилик һоқуқ көзитиш тәшкилатиниң б д т ишлириға мәсул директори луис чарбоне «ташқи сиясәт» журнилиға бәргән баянатида, униң зиярити «хитайниң бу иш террорлуққа қарши туруш мәсилиси, дегән хата пикирини етирап қилиш хәвпи яритиду» дегән. Лекин б д т баш катипи антонио гутерисниң баянатчиси стефан дуҗарич, б д т террорлуққа қарши туруш ишханисиниң «террорлуққа қарши турушта кишилик һоқуққа капаләтлик қилиш вә қанун билән башқуруш униң түп принсипи» икәнликини тәкитлигән. Бирақ б д т ниң сабиқ кишилик һоқуқ алий комиссари зәид раат әл һүсәйин, «лагерларда немә иш болуватқанлиқини әркин вә тосқунлуқсиз елип берилмиған һәрқандақ тәкшүрүш пайдисиз» дегән.

Америка һөкүмитиниң қаришичә, хәлқара җәмийәт хитайниң һәрқандақ зиярәт тәклипигә еһтият билән муамилә қилиши керәк икән. Америка ташқи ишлар министирлиқи баянатчиси «ташқи сиясәт» журнилиға бәргән бу һәқтики баянатида, «инчикилик билән пиланланған вә һөкүмәтниң һәмраһлиқидики шинҗаң зиярити ялғанчилиқни тарқитиш, хитайниң кишилик һоқуқни дәпсәндә қилиштәк мәвҗут реаллиқни пәрдазләшла ролини ойнайду» дегән.

Пикирләр (0)
Share
Толуқ бәт