B d t ning rusiyelik emeldarining Uyghur rayoni ziyariti endishe qozghidi

Muxbirimiz erkin
2019-06-14
Élxet
Pikir
Share
Print

B d t ning "Térrorluq ishliri mesilisi" ge mes'ul rusiyelik mu'awin bash katipi wladimir iwanowich woronkofning Uyghur rayonida ziyarette bolush pilani kishilik hoquq teshkilatliri we bezi gherb hökümetliride endishe qozghighan.

Amérikadiki "Tashqi siyaset" zhurnilining 13‏-iyun xewer qilishiche, kishilik hoquq teshkilatliri we bir qisim gherb hökümetliri xitayning woronkofning ziyaritini özining lagérlar heqqidiki teshwiqati üchün paydilinip kétishidin endishe qilmaqtiken. Woronkofning bu hepte ichide Uyghur rayonida ziyarette bolushni pilanlighanliqi, uninggha xitay jama'et xewpsizlik ministirining hemrah bolidighanliqi ilgiri sürülmekte.

"Tashqi siyaset" zhurnilining xewiride uning ziyariti emelge ashsa, "U xitay hökümiti bir milyondek Uyghurni lagérlarda tutup turuwatqan mezkur rayonni ziyaret qilghan tunji yuqiri derijilik b d t emeldari bolup qalidu" déyilgen. Lékin uning ziyaritini tenqid qilghuchilar, uning ziyariti mezkur rayonda Uyghurlargha qarshi élip bériwatqan heriketlerni térrorluqqa qarshi tedbir, dep aqlawatqan xitayni qollighanliq bolup qalidighanliqini agahlandurmaqta.

Kishilik hoquq közitish teshkilatining b d t ishlirigha mes'ul diréktori lu'is charboné "Tashqi siyaset" zhurniligha bergen bayanatida, uning ziyariti "Xitayning bu ish térrorluqqa qarshi turush mesilisi, dégen xata pikirini étirap qilish xewpi yaritidu" dégen. Lékin b d t bash katipi antoni'o gutérisning bayanatchisi stéfan dujarich, b d t térrorluqqa qarshi turush ishxanisining "Térrorluqqa qarshi turushta kishilik hoquqqa kapaletlik qilish we qanun bilen bashqurush uning tüp prinsipi" ikenlikini tekitligen. Biraq b d t ning sabiq kishilik hoquq aliy komissari ze'id ra'at el hüseyin, "Lagérlarda néme ish boluwatqanliqini erkin we tosqunluqsiz élip bérilmighan herqandaq tekshürüsh paydisiz" dégen.

Amérika hökümitining qarishiche, xelq'ara jem'iyet xitayning herqandaq ziyaret teklipige éhtiyat bilen mu'amile qilishi kérek iken. Amérika tashqi ishlar ministirliqi bayanatchisi "Tashqi siyaset" zhurniligha bergen bu heqtiki bayanatida, "Inchikilik bilen pilanlan'ghan we hökümetning hemrahliqidiki shinjang ziyariti yalghanchiliqni tarqitish, xitayning kishilik hoquqni depsende qilishtek mewjut ré'alliqni perdazleshla rolini oynaydu" dégen.

Toluq bet