ب د ت نىڭ كىشىلىك ھوقۇق ئالى كومىسسارى مىشېل باچىلېت ب د ت يىغىنىدا سۆز قىلىپ، ئۇيغۇر ئېلىنى بۇ يىلنىڭ ئاخىرى زىيارەت قىلىشنى، رايوندىكى ئېغىر كىشىلىك دەپسەندىچىلىكىگە ئائىت خەۋەرلەرنى «ھەقىقىي رەۋىشتە تەكشۈرۈش» كە يول قويۇلۇشىنى ئۈمىد قىلىدىغانلىقىنى بىلدۈرگەن.
مىشېل باچىلېت بۇ ئۈمىدىنى ب د ت كىشىلىك ھوقۇق كېڭىشىنىڭ 21-ئىيۇن جەنۋەدە باشلانغان 47-نۆۋەتلىك يىغىنىدا قىلغان سۆزىدە ئېيتقان. رويتېرس ئاگېنتلىقىنىڭ بىلدۈرۈشىچە، بۇ مىشېل باچىلېتنىڭ تۇنجى قېتىم ئۇيغۇر ئېلىنى زىيارەت قىلىش توغرىسىدا كونكىرېت ۋاقىت جەدۋىلىنى ئوتتۇرىغا قويۇشى ئىكەن.
مىشېل باچىلېتنىڭ ئىشخانىسى خىتاي بىلەن 2018-يىلى 9-ئايدىن بېرى ئۇيغۇر ئېلىنى زىيارەت قىلىش توغرىسىدا سۆزلىشۋاتقان بولسىمۇ، بىراق خىتاي تەرەپ «ئەركىن تەكشۈرىشۈ» كە يول قويۇشنى رەت قىلىپ كەلگەن ئىدى. رويتېرس ئاگېنتلىقىنىڭ بىلدۈرۈشىچە، خىتاينىڭ جەنۋەدە تۇرۇشلۇق ۋەكىلى بۇ ھەقتىكى ئىنكاسىدا، شىنجاڭ بىلەن خوڭكوڭ «خىتاي زېىنىنىڭ ئايرىلماس پارچىسى» ئىكەنلىكى، «چەت ئەل كۈچلىرىنىڭ ئارلىشىشىغا يول قويمايدىغانلىقى» نى ئېيتقان.
مىشېل باچىلېت سۆزىدە «مەن خىتاي بىلەن شىنجاڭ ئۇيغۇر ئاپتونوم رايونىدا زىيارەتتە بولۇشنىڭ ئۇسۇللىرىنى داۋاملىق سۆزلىشىمەن. بولۇپمۇ كىشىلىك ھوقۇققا ئېغىر دەخلى-تەرۇز قىلىنىۋاتقانلىقى داۋاملىق ئوتتۇرىغا چىقىۋاتقان ئەھۋالدا، مەن بۇنىڭ بۇ يىل ئەمەلگە ئېشىشىنى ئۈمىد قىلىمەن،» دېگەن. مىشېل باچىلېت يەنە خوڭكوڭ ۋەزىيىتىدىنمۇ ئەندىشە قىلىۋاتقانلىقىنى بىلدۈرگەن. ئۇنىڭ ئېيتىشىچە، «خوڭكوڭ خەۋپسىزلىك قانۇنى» خوڭكوڭ دېموكراتىيەسى ۋە ئاخباراتىدا «قورقۇنۇچلۇق تەسىر» ياراتقان.