Явропа иттипақи б д т да хитайни хәлқараниң уйғур районида шәртсиз тәкшүрүш елип беришиға йол қоюшқа чақирди

Явропа иттипақиниң юқири дәриҗилик әмәлдари б д т кишилик һоқуқ кеңишиниң йиғинида сөз қилип, хитай һөкүмитини хәлқара көзәткүчиләрниң уйғур аптоном районида шәртсиз вә тосқунлуқсиз тәкшүрүш елиш беришиға йол қоюшқа чақирған.

Йиғинда явропа иттипақиниң инсанпәрвәрлик ярдими вә кризис ишлириға мәсул комиссари кристос стайлианедис явропа иттипақиниң бихәтәрлик вә ташқи ишлар комиссари федирика могәриниға вакалитән сөз қилғанда юқириқи чақириқини оттуриға қойған.

У; “биз хитайни б д т кишилик һоқуқ алий комиссарини өз ичигә алған мустәқил көзәткүчиләрниң шинҗаңда тәкшүрүш елип беришиға һәқиқий рәвиштә йол қоюшқа чақиримиз” дегән. Б д т кишилик һоқуқ кеңишиниң 40‏-нөвәтлик йиғини 25‏-феврал күни башланған.

Йиғинниң тунҗи күни түркийә ташқи ишлар министири мәвлут чавушоғлу нутуқ сөзләп, хитайни уйғурларниң кишилик һоқуқи вә диний әркинликигә һөрмәт қилишқа чақирған. У, хитайни “бигунаһ хәлқ билән террорчиларни пәрқләндүрүш” кә үндигән иди.

Кристос стайлианедисниң билдүрүшичә, явропа иттипақи бу нөвәтлик йиғинда 4 хил тәшәббусни оттуриға қойидикән. У йиғинда, б д т кишилик һоқуқ кеңишигә әза дөләтләрни б д т ниң вә униңға вакаләтлик қилғучи орунларниң вәқә йүз бәргән дөләтләрдә шәртсиз вә тосқунлуқсиз тәкшүрүш елип беришиға капаләтлик қилишини тәләп қилған.

Явропа иттипақи мәзкур чақириқни хитай һөкүмити мисир, пакистан, сәуди әрәбистан, баңладиш, русийә, һиндонезийә қатарлиқ дөләтләрниң дипломатлирини, һөкүмәт таратқулириниң мухбирлирини вә радикал солчи партийә-гуруһларниң вәкиллирини тәшкилләп, уйғур районидики аталмиш “кәспий тәрбийәләш мәркәзлири” ни зиярәт қилдуруватқан бир вақитта оттуриға қойди.

Уйғур кишилик һоқуқ тәшкилатлириниң илгири сүрүшичә, хитай һөкүмити “кәспий тәрбийәләш мәркәзлири” арқилиқ уйғур районидики йиғивелиш лагерлирини пәрдазлимақта икән.