Yawropa ittipaqi b d t da xitayni xelq'araning Uyghur rayonida shertsiz tekshürüsh élip bérishigha yol qoyushqa chaqirdi
Yawropa ittipaqining yuqiri derijilik emeldari b d t kishilik hoquq kéngishining yighinida söz qilip, xitay hökümitini xelq'ara közetküchilerning Uyghur aptonom rayonida shertsiz we tosqunluqsiz tekshürüsh élish bérishigha yol qoyushqa chaqirghan.
-
Muxbirimiz erkin
2019-03-04 -
-
-
Yawropa ittipaqining yuqiri derijilik emeldari b d t kishilik hoquq kéngishining yighinida söz qilip, xitay hökümitini xelq'ara közetküchilerning Uyghur aptonom rayonida shertsiz we tosqunluqsiz tekshürüsh élish bérishigha yol qoyushqa chaqirghan.
Yighinda yawropa ittipaqining insanperwerlik yardimi we krizis ishlirigha mes'ul komissari kristos stayli'anédis yawropa ittipaqining bixeterlik we tashqi ishlar komissari fédirika mogerinigha wakaliten söz qilghanda yuqiriqi chaqiriqini otturigha qoyghan.
U؛ “Biz xitayni b d t kishilik hoquq aliy komissarini öz ichige alghan musteqil közetküchilerning shinjangda tekshürüsh élip bérishigha heqiqiy rewishte yol qoyushqa chaqirimiz” dégen. B d t kishilik hoquq kéngishining 40-nöwetlik yighini 25-féwral küni bashlan'ghan.
Yighinning tunji küni türkiye tashqi ishlar ministiri mewlut chawush'oghlu nutuq sözlep, xitayni Uyghurlarning kishilik hoquqi we diniy erkinlikige hörmet qilishqa chaqirghan. U, xitayni “Bigunah xelq bilen térrorchilarni perqlendürüsh” ke ündigen idi.
Kristos stayli'anédisning bildürüshiche, yawropa ittipaqi bu nöwetlik yighinda 4 xil teshebbusni otturigha qoyidiken. U yighinda, b d t kishilik hoquq kéngishige eza döletlerni b d t ning we uninggha wakaletlik qilghuchi orunlarning weqe yüz bergen döletlerde shertsiz we tosqunluqsiz tekshürüsh élip bérishigha kapaletlik qilishini telep qilghan.
Yawropa ittipaqi mezkur chaqiriqni xitay hökümiti misir, pakistan, se'udi erebistan, bangladish, rusiye, hindonéziye qatarliq döletlerning diplomatlirini, hökümet taratqulirining muxbirlirini we radikal solchi partiye-guruhlarning wekillirini teshkillep, Uyghur rayonidiki atalmish “Kespiy terbiyelesh merkezliri” ni ziyaret qilduruwatqan bir waqitta otturigha qoydi.
Uyghur kishilik hoquq teshkilatlirining ilgiri sürüshiche, xitay hökümiti “Kespiy terbiyelesh merkezliri” arqiliq Uyghur rayonidiki yighiwélish lagérlirini perdazlimaqta iken.