B d t ning kishilik hoquq komitéti Uyghur diyarigha bérishni telep qilmaqta

Xitay hökümitining Uyghur diyaridiki siyasiy basturush herikiti pütün dunyaning zor diqqitini qozghawatqanda b d t kishilik hoquq aliy kéngishining yéngidin teyinlen'gen re'isi mishél bashilét zor sandiki Uyghurlarning ushtumtut ghayib bolup kétishi we tutqun qilinishigha da'ir ehwallarni tekshürüsh üchün Uyghur diyarigha bérishni telep qildi.

Roytéris agéntliqining 6-marttiki xewiride éytilishiche, mishél yéqinda xitay hökümitige telep sunup, özining Uyghur diyarigha bérishi we neq meydan tekshürüshide bolidighanliqini bildüridiken. Xewerde körsitilishiche, mishél shu küni b d t ning kishilik hoquq aliy kéngishide doklat bergendin kéyin bu sözlerni qilghan. U bu heqte toxtilip “Muqimliq we bixeterlik barliq xelqlerning heqlirige hörmet qilish asasida berpa qilinishi lazim” dégen. Melum bolushiche, buningdin bir kün burun b d t ning diniy étiqad erkinliki mesililirini tekshürgüchisi ehmed shahidmu xitay hökümitidin Uyghur diyarigha bérishni telep qilghan idi. Halbuki, ularning Uyghur diyarigha bérish telipige xitay hökümitining qandaq jawab bérishi téxi namelum iken.

Halbuki, xitay hökümiti yéqinqi mezgillerde özlirining iqtisadiy boyunturuqi astidiki bir qisim döletlerning diplomatliridin atalmish “Ékskursiye ömiki” teshkillep, Uyghur diyarida ziyaretke orunlashturghan idi. Bu chet'el diplomatliri bolsa aldin teyyarlan'ghan “Terbiyelesh merkizi” de ziyarette bolghandin kéyin bu jaylarning “Uyghurlar arisida zor alqishqa érishkenliki” heqqide bes-beste söz qilghan. Shu qatarda islam dunyasidiki hemmige tonushluq bolghan afghanistan diyaridin teshkillen'gen bir guruppa “Ékiskursiye ömiki” Uyghurlar diyarini közdin kechürgendin kéyin xitay axbarat wasitilirige öz tesiratini bayan qilip “U jayda tinchliq, muqimliq, asayishliqni, shuningdek köp menbelikke toyun'ghan inaq jem'iyetni körduq” dégen.