Xitay, b d t ning Uyghurlar we tibetlerge alaqidar tekliplirini ret qilghan

Xitay, birleshken döletler teshkilati teripidin xitayning kishilik hoquq weziyiti heqqide bérilgen teklip-pikirlerning köpinchisini ret qilghan.

Ötken yili noyabirda birleshken döletler teshkilatida xitayning kishilik hoquq xatirisini “Uniwérsal qerellik körüp chiqish” yighini échilghan idi. Yighin axirida xitaygha 346 maddidin terkib tapqan bir teklip sunulghan.

Xongkong erkin axbarati gézitining xewer qilishiche, xitay terep 5-mart küni yuqiridiki bu tekliplerning 62 maddisini ret qilghan we bu maddilarni “Xitayning dölet weziyiti we qanunlirigha uyghun emes, u siyasiy qaratmiliqqa ige, saxta” dep körsetken.

Melum bolushiche, xitay ret qilghan maddilar asasen xitay hökümitining Uyghur élide we shundaqla tibet rayonida yürgüzüwatqan milliy we dini bésim siyasetliri, ölüm jazasi, xususiy erkinlik mesililirige a'it iken.

2018-Yili 11-ayning 6-küni échilghan “Uniwérsal qerellik körüp chiqish” yighinida amérika, en'gliye, awstraliye qatarliq 24 dölet xitay hökümitining Uyghurlar we tibetlerge yürgüzüwatqan siyasitini eyibligen. Bular ichidiki 14 dölet bolsa Uyghur élide lagérning mewjutluqidin söz achqan. Halbuki, héchbir musulman döliti xitayning kishilik hoquq depsendichilikini tilgha almighanni az dep, xitayning kishilik hoquq jehette qolgha keltürgen atalmish netijilirige utuq tiligen idi.