B d t ning xitayni yéngi qurulghan énérgiye ötkünchi minéral kan maddiliri komitétigha tallishi tenqidke uchridi

Washin'gtondin muxbirimiz erkin teyyarlidi
2024.04.29

B d t ning Uyghurlargha irqiy qirghinchiliq qilish bilen eyibliniwatqan xitayni yéngi qurulghan b d t halqiliq énérgiye ötkünchi minéral kan maddiliri komitétining ezaliqigha tallishi tenqidke uchridi.

Amérikadiki bezi taratqularning bildürüshiche, b d t bash katipi gutérrés, 26-aprél xitayni öz ichige alghan 23 döletni b d t ning halqiliq énérgiye ötkünchi minéral kan maddilirini ishlepchiqirish sahesidiki kishilik hoquqni yaxshilash meqsitide qurulghan bu komitétning ezaliqigha teyinligen.

Amérikadiki “Kündilik chaqiriq” namliq tor gézitining 27-aprél bergen bu heqtiki bir xewiride, xitayning halqiliq ötkünchi énérgiye minéral kan maddilirini ishlepchiqirish sahesi Uyghur mejburiy emgiki keng omumlashqan sahe, dep qarilidighanliqi we amérika tashqi ishlar ministirliqining xitayni Uyghurlargha irqiy qirghinchiliq qilmaqta, dep eyiblewatqanliqini bildürgen.

“Kündilik chaqiriq” torining qeyt qilishiche, Uyghurlargha irqiy qirghinchiliq qilish bilen eyibliniwatqan xitay, bu komitétta “Muhit we ijtima'iy ölchemlerni qoghdashning dunyawi ortaq we xalisane pirinsiplirini békitishke qatniship”, halqiliq yéshil énérgiye kan maddilirini ishlepchiqirish saheside “Adaletni ornitish” xizmitini ishleydiken. Xewerde, yéngi qurulghan bu komitétning xizmitining mis, léti, nikél, kobalt we bashqa qimmetlik kan mehsulatlirining qézilishigha merkezlishidighanliqi bildürülmekte.

Melum bolushiche, xitay bu xil kan mehsulatlirida dunya bazirini monopol qilip kelgen. Bezi chet el tetqiqat orunlirining doklatlirida, xitayning tokluq aptomobil bataréyesi we küntaxta matériyallirini ishlepchiqirish bazilirida Uyghur mejburiy emgikining ishlitilidighanliqi qeyt qilinmaqta. En'gliye shéfféld hallam uniwérsitéti bilen washin'gtondiki istratégiye we xelq'ara tetqiqat merkezlirining élan qilghan tekshürüsh doklatlirida xitay yéshil énérgiye sana'itining Uyghur mejburiy emgikige chétilidighanliqi bildürülgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.