Xitay hökümiti b d t kishilik hoquq komitétining re'isini Uyghur diyarigha teklip qildi

Muxbirimiz eziz
2019-06-13
Élxet
Pikir
Share
Print

Xitay hökümitining milyonlighan Uyghurni lagérlargha qamishi xelq'arada zor diqqet qozghighandin kéyin xitay hökümiti bir qisim ushshaq döletlerning diplomatlirini ürümchi, qeshqer we xoten qatarliq jaylardiki bir qisim "Terbiyelesh merkezliri" ge ékskursiyege orunlashturghan idi. 13-Iyun küni xitay hökümiti birleshken döletler teshkilati (b d t) kishilik hoquq aliy kéngishining re'isi méshél bachélotni ékskursiyege teklip qildi.

"Jenubiy xitay etigenlik géziti" ning 13-iyundiki xewiride éytilishiche, xitayning b d t da turushluq bash elchisi chén shü jenwediki muxbirlarni kütüwélish yighinida bu teklipni jakarlighan hemde "Re'is méshél bachélotni shinjangdiki ma'arip arqiliq terbiyelesh merkezlirining esebiylikni tügitishke qandaq yardimi bolghanliqini öz közi bilen körüp ketsiken, dégen ümidtimiz. Chünki köz bilen körgen'ge ishinish eng aqilaniliqtur" dégen. Ilgiri xitay hökümiti b d t emeldarlirining "Ichki ishlargha arilashmasliq" sherti bilen Uyghurlar diyarigha tekshürüshke barsa bolidighanliqini éytip kelgen.

Melum bolushiche, ilgiri chilining prézidénti bolghan méshél xanim 2018-yili awghusttin bashlap zeyid hüseyinning ornigha chiqqan hemde izchil türde b d t ning Uyghur diyaridiki tutqun ehwalini tekshürüshi lazimliqini tekitlep kelgen iken. Emma u bu teklipke hazirche inkas qayturmighan.

Toluq bet