Хитай кишилик һоқуқ тәшкилатлириниң қаршилиқиға қаримай, б д т кишилик һоқуқ кеңишиниң әзалириға қайта сайланған

Б д т омуми кеңишигә әза дөләтләр 10-өктәбир күни аваз берип, хитайни кишилик һоқуқ кеңишиниң әзалиқиға қайта сайлиған. Буниңдин бурун кишилик һоқуқ тәшкилатлири б д т омуми кеңишиниң әзалирини хитайға биләт ташлимаслиққа чақирип, уйғурларға “ирқий қирғинчилиқ” қиливатқан хитайниң б д т кишилик һоқуқ кеңишигә әза болушқа лайиқ әмәсликини билдүргәниди. Лекин б д т омуми кеңишигә әза 193 дөләтниң аваз бериш нәтиҗисидин мәлум болушичә, хитай 10-өктәбир күнидики биләт ташлашта кишилик һоқуқ кеңишиниң асия-тинч окян районидин бош қалған 4 орунниң биригә қайта еришкән. Хәвәрләрдә, асия-тинч окян районидин сайланған қалған 3 дөләтниң непал, пакистан вә өзбекистан икәнлики қәйт қилинмақта.

Пакистан билән өзбекистан б д т кишилик һоқуқ кеңиши өткән йили 10-айда уйғурларниң вәзийитини тәкшүрүш һәққидики бир тәклип лайиһәсини авазға қойғанда униңға рәт авази берип, хитайни қоллиған. Бу қетим кишилик һоқуқ кеңишигә толуқлап сайланған 15 дөләтниң әнглийә, фирансийә, мексикадин башқа мутләқ көп қисминиң, б д т да даим хитайни қоллайдиған дөләтләр болуши кишилик һоқуқ тәшкилатлирини үмидсизләндүрмәктә.

9-Өктәбир күни хәлқарадики 80 нәччә тәшкилат ортақ баянат елан қилип, б д т омуми кеңишигә әза дөләтләрни хитайға биләт ташлимаслиққа чақирғаниди. Баянатта, әза дөләтләрниң һечболмиса 47 дөләттин тәшкил тапқан кишилик һоқуқ кеңишидә бир орунни бош қалдуруп қоюши, чүнки хитайниң кишилик һоқуқ кеңишигә әза болушқа лайиқ әмәслики, униң б д т кишилик һоқуқ механизимиға бузғунчилиқ қиливатқанлиқи билдүрүлгән. Кишилик һоқуқ тәшкилатлири хитайниң кишилик һоқуқ кеңишигә қайта сайлинишиниң “хата сигнал” беридиғанлиқини агаһландурғаниди.