Xitay kishilik hoquq teshkilatlirining qarshiliqigha qarimay, b d t kishilik hoquq kéngishining ezalirigha qayta saylan'ghan

B d t omumi kéngishige eza döletler 10-öktebir küni awaz bérip, xitayni kishilik hoquq kéngishining ezaliqigha qayta saylighan. Buningdin burun kishilik hoquq teshkilatliri b d t omumi kéngishining ezalirini xitaygha bilet tashlimasliqqa chaqirip, Uyghurlargha “Irqiy qirghinchiliq” qiliwatqan xitayning b d t kishilik hoquq kéngishige eza bolushqa layiq emeslikini bildürgenidi. Lékin b d t omumi kéngishige eza 193 döletning awaz bérish netijisidin melum bolushiche, xitay 10-öktebir künidiki bilet tashlashta kishilik hoquq kéngishining asiya-tinch okyan rayonidin bosh qalghan 4 orunning birige qayta érishken. Xewerlerde, asiya-tinch okyan rayonidin saylan'ghan qalghan 3 döletning népal, pakistan we özbékistan ikenliki qeyt qilinmaqta.

Pakistan bilen özbékistan b d t kishilik hoquq kéngishi ötken yili 10-ayda Uyghurlarning weziyitini tekshürüsh heqqidiki bir teklip layihesini awazgha qoyghanda uninggha ret awazi bérip, xitayni qollighan. Bu qétim kishilik hoquq kéngishige toluqlap saylan'ghan 15 döletning en'gliye, firansiye, méksikadin bashqa mutleq köp qismining, b d t da da'im xitayni qollaydighan döletler bolushi kishilik hoquq teshkilatlirini ümidsizlendürmekte.

9-Öktebir küni xelq'aradiki 80 nechche teshkilat ortaq bayanat élan qilip, b d t omumi kéngishige eza döletlerni xitaygha bilet tashlimasliqqa chaqirghanidi. Bayanatta, eza döletlerning héchbolmisa 47 dölettin teshkil tapqan kishilik hoquq kéngishide bir orunni bosh qaldurup qoyushi, chünki xitayning kishilik hoquq kéngishige eza bolushqa layiq emesliki, uning b d t kishilik hoquq méxanizimigha buzghunchiliq qiliwatqanliqi bildürülgen. Kishilik hoquq teshkilatliri xitayning kishilik hoquq kéngishige qayta saylinishining “Xata signal” béridighanliqini agahlandurghanidi.