Чәтәл таратқулири бейҗиң қишлиқ олимпик мусабиқисини тарқитиш пиланлиридин ваз кечишкә чақирилди

Мухбиримиз әркин
2021-09-08
Share

Хәлқара кишилик һоқуқ тәшкилатлири очуқ хәт елан қилип, американиң NBC торини өз ичигә алған чәтәл таратқулирини уйғурлар тәрипидин "ирқий қирғинчилиқ олимпики" дәп аталған бейҗиң қишлиқ олимпик мусабиқисини тарқитиш пиланидин ваз кечишкә чақирған.

Уйғур, хоңкоң, тибәтләрни ‍өз ичигә алған дунядики 200 дин артуқ тәшкилат бирлишип елан қилған бу чақириқ бейҗиң қишлиқ олимпикиға 6 айдәк вақит қалған шундақла токю язлиқ олимпики билән токйо мейипләр олимпикиниң арқисидинла елан қилинған.

Бирләшмә агентлиқиниң хәвәр қилишичә, ‍очуқ хәт хәлқарадики 26 ахбарат гуруһиға йезилған болуп, униң бир нусхиси 7-сентәбир NBC ниң иҗраийә директори җәф шелғиму әвәтилгән. NBC Кәлгүсидики 6 қетимлиқ олимпик мусабиқисиниң тарқитиш һоқуқи үчүн 7 милярд 750 милйон доллар төлигән болуп, у хәлқара олимпик комитетиниң әң йеқин шериклириниң биридур. Мәлум болушичә, бу пул хәлқара олимпик комитети омуми кириминиң 40 пирсәнтини дегүдәк тәшкил қилидикән.

Очуқ хәттә: "силәр барлиқ ширкәтләр хитайниң еғир вә давамлиқ яманлишиватқан кишилик һоқуқ дәпсәндичиликини тәнтәрбийә арқилиқ ююш пиланиға шерик болуш вә хитай даирилириниң һәрикитигә илһам бериш хәвпигә дуч кәлмәктә…. . Силәрниң ширкәтлириңлар 2022-йиллиқ бейҗиң қишлиқ олимпикини тарқитиши арқилиқ бу дәпсәндичиликни қанунлаштуриду вә ирқий қирғинчилиқ мусабиқиси, дәп қаралған бу оюнға түрткә болиду" дейилгән.

Бу очуқ хәткә уйғурлардин дуня уйғур қурултийи, уйғур һәрикити қатарлиқ тәшкилатлар имза қойған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт