Kanada ‍öktichi partiyesi kanadaning béyjing qishliq olimpik musabisigha qatnashmasliqini telep qilghan

Kanadadiki eng chong öktichi partiye-konsérwatiplar partiyesining rehbiri érin otul kanada bash ministiri térudé'ogha xet yézip, Uyghurlargha “Irqiy qirghinchiliq” qilghan xitayning béyjing qishliq olimpik musabiqisigha kanadaning tenterbiyechi ewetmeslikini telep qilghan.

Érin otulning éytishiche, térudé'o G-7 döletlirining bashliqlar yighinida xitaygha qarshi pozitsiye bildürishi, shundaqla béyjing qishliq olimpik musabiqisini bashqa döletke yötkeshni telep qilishi kérek ‍iken. G-7 Döletlirining bashliqlar yighini bu heptining axirliri en'giliyede ‍ötküzilidiken.

“Jenubiy xitay etigenlik pochtisi” gézitining bildürüshiche, érin otul bu xetni ‍ötken jüme küni ewetken bolup, u térudé'oning “Bash ministir bolush süpiti bilen dunya sehniside 2022-yilliq qishliq béyjing olimpik musabiqisini bashqa döletke yötkeshke chaqirishini soraydighanliqi” ni bildürgen. U mundaq dégen: “Uyghurlargha irqiy qirghinchiliq élip bériliwatqanda, kanada puqrasi maykél kowrig bilen maykél spawor dawamliq tutup turulghan ehwalda, kanada ‍özining tenterbiyechilirini xitaygha ewetmesliki kérek.”

Érin otul yene en'giliye bash ministiri boris jonsonningmu béyjing qishliq olimpikini bashqa döletke yötkesh üchün bésim ishlitishini telep qilghan. Chet el taratqulirining éytishiche, G-7 döletliri bashliqlirining bu nöwetlik yighinida Uyghur mesilisimu küntertipke qoyulidiken. Prézidént baydénning mu'awin dölet xewpsizlik meslihetchisi dalép sin'g bu yil 4-ayda Uyghur mesilisining bu yighinda küntertipke qoyulidighanliqini ilgiri sürgen idi.