Америка һөкүмити бейҗиң олимпик мусабиқисини байқут қилишқа һәмраһ издимәктә

Хитай һөкүмитиниң уйғур дияридики ирқий қирғинчилиқиға қарши туруштики тәдбирләрниң бири, дәп қариливатқан бейҗиң қишлиқ олимпик мусабиқисини байқут қилиш һәркити изчил америка һөкүмити җиддий ойлишип келиватқан мәсилиләрниң бири иди. 7-Июн күни америка ташқи ишлар министири антони билинкен әпәнди бу мәсилини йәнә бир қетим алаһидә тәкитлиди.

“җумһурийәт дуняси” гезитиниң 8-июндики хәвиридә ейтилишичә, америка дөләт мәҗлисидә өткүзүлгән гуваһлиқ йиғинида антони билинкен бу һәқтә сөз қилип: “олимпик мәсилисидә биз иттипақдашлиримиз вә достлиримиз билән бирликтә ортақ көзқарашқа келиватимиз. Чүнки бу мәсилидә һәмкарлиқ асасида иш көрүш өз алдимизға иш көрүштин көп үнүмлүк” дегән.

Җумһурийәтчиләр партийәсидин болған көплигән һөкүмәт әмәлдарлири изчил хитай һөкүмитиниң уйғурларға қарита ирқий қирғинчилиқ қиливатқанлиқини тәкитләп, 2022-йили бейҗиңда өткүзүлмәкчи болуватқан қишлиқ олимпик мусабиқисини байқут қилишни тәләп қиливатқан иди. Нөвәттә демократлар партийәсидин болған юқури дәриҗилик әмәлдарларниңму бу чақириққа аваз қошуши байдин һөкүмитиниң бу мәсилигә салмақлиқ муамилә қиливатқанлиқиниң ипадиси, дәп қариливатқанлиқи мәлум. Өткән айдила америка авам палатасиниң рәиси нәнси пелоси ханим бейҗиң олимпик мусабиқисини “дипломатик байқут қилиш” чақириқини оттуриға қойған иди. У бу һәқтә сөз қилип “дөләт рәһбәрлири хитайға бериш арқилиқ хитай һөкүмитигә шәрәп қучуш пурсити яритип бәрсә болмайду” дегән иди. Нөвәттә һәр икки партийә вәкиллири бирдәк “хитай һөкүмити уйғур қирғинчилиқини тохтатмайдикән, бейҗиң олимпик мусабиқисиниң орнини башқа җайға өзгәртиш лазим” дегән мәзмунда хәлқара олимпик комитетиға бесим ишләтмәктә икән.