Amérika hökümiti béyjing olimpik musabiqisini bayqut qilishqa hemrah izdimekte

Xitay hökümitining Uyghur diyaridiki irqiy qirghinchiliqigha qarshi turushtiki tedbirlerning biri, dep qariliwatqan béyjing qishliq olimpik musabiqisini bayqut qilish herkiti izchil amérika hökümiti jiddiy oyliship kéliwatqan mesililerning biri idi. 7-Iyun küni amérika tashqi ishlar ministiri antoni bilinkén ependi bu mesilini yene bir qétim alahide tekitlidi.

“Jumhuriyet dunyasi” gézitining 8-iyundiki xewiride éytilishiche, amérika dölet mejliside ötküzülgen guwahliq yighinida antoni bilinkén bu heqte söz qilip: “Olimpik mesiliside biz ittipaqdashlirimiz we dostlirimiz bilen birlikte ortaq közqarashqa kéliwatimiz. Chünki bu mesilide hemkarliq asasida ish körüsh öz aldimizgha ish körüshtin köp ünümlük” dégen.

Jumhuriyetchiler partiyesidin bolghan köpligen hökümet emeldarliri izchil xitay hökümitining Uyghurlargha qarita irqiy qirghinchiliq qiliwatqanliqini tekitlep, 2022-yili béyjingda ötküzülmekchi boluwatqan qishliq olimpik musabiqisini bayqut qilishni telep qiliwatqan idi. Nöwette démokratlar partiyesidin bolghan yuquri derijilik emeldarlarningmu bu chaqiriqqa awaz qoshushi baydin hökümitining bu mesilige salmaqliq mu'amile qiliwatqanliqining ipadisi, dep qariliwatqanliqi melum. Ötken aydila amérika awam palatasining re'isi nensi pélosi xanim béyjing olimpik musabiqisini “Diplomatik bayqut qilish” chaqiriqini otturigha qoyghan idi. U bu heqte söz qilip “Dölet rehberliri xitaygha bérish arqiliq xitay hökümitige sherep quchush pursiti yaritip berse bolmaydu” dégen idi. Nöwette her ikki partiye wekilliri birdek “Xitay hökümiti Uyghur qirghinchiliqini toxtatmaydiken, béyjing olimpik musabiqisining ornini bashqa jaygha özgertish lazim” dégen mezmunda xelq'ara olimpik komitétigha bésim ishletmekte iken.