Béyjingda teshwiqat ussuligha sélin'ghan Uyghur baliliri “Eng aliy mukapat” qa érishken

Xitay merkiziy téléwiziye istansisi qeshqerde uyushturghan “Chaghan kéchiliki” sehniside ussul oynap chiqqan kino artisi dilreba xitay tamashibinlirining alahide diqqitini tartip, “Güzel makan shinjang” témisidiki teshwiqatning daghdughisini peyda qilghandin kéyin, xitay medeniyet tarmaqliri “Shinjang ussuli” ning teshwiqattiki rolini téximu kücheytish sepirini dawamlashturghan.

“Shinjang géziti” torining 16-féwral küni chiqarghan süretlik xewirige qarighanda, bir top talantliq Uyghur baliliri xitay merkiziy téléwiziye istansisi béyjingda ötküzgen “Memliketlik ussul musabiqisi” gha qatnashturulghan bolup, musabiqide “Eng aliy mukapat” qa érishken. Ular yene béyjingdiki xan sariyi, seddichin sépili, poyiz istansisi qatarliq nuqtilarda ussul oynap, xitay puqralirining diqqitini tartqan.

Bu xewerde, Uyghur ussuli tamamen “Shinjang ussuli” dep atalghan bolup, “Uyghur” dégen isim Uyghurlargha xas medeniyetning namidin chiqirip tashlan'ghan؛ andin “Shinjang ussuli shinjangdiki muhim medeniyet türi, uningda en'eniwi jungxu'a medeniyitining séhriy küchimu bolghanliqi üchün tamashibinlarni jelp qilidu” déyilgen.

Yene bir jehettin, xitay teshwiqat orunliri ussul arqiliq Uyghurlarni bextlik körsitishke urunup kéliwatqan bolup, bu qétim ussulgha sélin'ghan Uyghur balilirimu xitayning 15 yilliq mejburiy ma'aripining méwisi, “Her millet balilirining xushal-xuram yashawatqanliqi” ning namayendisi qilip körsitilgen. Halbuki, adriyan zénz qatarliq tetqiqatchilarning doklatida, 800 mingdin 1 milyon'ghiche Uyghur balilirining ata-anisidin ayriwétilip, yataqliq mektepte xitay tili we xitayche angda terbiyeliniwatqanliqi delillen'genidi.