Белгийә парламентиға “уйғур мәҗбури әмгәк мәһсулатлирини чәкләш қанун лайиһәси” сунулған

Белгийәниң йешиллар партийәсидин болған парламент әзаси самуел коголати белгийә парламентиға “уйғур мәҗбури әмгәк мәһсулатлириниң белгийәгә импорт қилинишини чәкләш тоғрисида қанун лайиһәси” сунған.

Мәлум болушичә, мәзкур қанун лайиһәси йешиллар партийәсидин болған йәнә бир парламент әзаси стефан фон һекниңму қошумчә имза қоюшиға еришкән. Буниң билән белгийә парламенти явропа иттипақидики дөләтләр ичидә “уйғур мәҗбури әмгәк мәһсулатлирини чәкләш тоғрисида рәсмий қанун тәклип лайиһәси сунулған тунҗи парламент болуп қалған.

Самуел коголати илгири белгийә парламентиниң хитайниң уйғурларға тутқан муамилисини “ирқий қирғинчилиқ” дәп етирап қилишидиму һалқилиқ рол ойниған иди. Самуел коголати фейсбукта елан қилған бу һәқтики учурида: “бизниң җаза қанунимизда қул әмгики мәһсулатлириниң импорт қилинишини чәкләш үчүн стефан фон һек билән бу қанун лайиһәсини ‍имзалиғанлиқимиздин иптихарлинимән,” дәп көрсәткән. У йәнә мундақ дегән: “21-әсирдә дөләт һалқиған ширкәтләрниң йәнила хитайдики уйғур мәҗбурий әмгәк лагерлирида ишләпчиқирилған майка яки конго демокраик җумһурийитидики бала қуллар қезип чиқарған кобалитларни чәклимәй һазирму импорт қилиши кишини ечиндуриду.”

Мәлум болушичә, әгәр бу қанун лайиһәси белгийә парламенти тәрипидин мақулланса, мәҗбурий әмгәк мәһсулатлирини билип туруп белгийәгә импорт қилғанлар бир йилдин бәш йилғичә қамаққа һөкүм қилинидикән. Мәзкур қанун лайиһәси хитай билән белгийә бу йил 2-айда қәшқәр билән белгийәниң сода мәркизи леҗ оттурисида авиатсийә йүк транспорт йоли ечип арқидинла оттуриға қоюлған. Мәзкур авиатсийә йүк трансипорт йоли хәлқара парламентлар ара хитай бирләшмисиниң линийәсиниң тәнқидигә учриған иди.