Bélgiye parlaméntigha “Uyghur mejburi emgek mehsulatlirini cheklesh qanun layihesi” sunulghan

Bélgiyening yéshillar partiyesidin bolghan parlamént ezasi samu'él kogolati bélgiye parlaméntigha “Uyghur mejburi emgek mehsulatlirining bélgiyege import qilinishini cheklesh toghrisida qanun layihesi” sun'ghan.

Melum bolushiche, mezkur qanun layihesi yéshillar partiyesidin bolghan yene bir parlamént ezasi stéfan fon hékningmu qoshumche imza qoyushigha érishken. Buning bilen bélgiye parlaménti yawropa ittipaqidiki döletler ichide “Uyghur mejburi emgek mehsulatlirini cheklesh toghrisida resmiy qanun teklip layihesi sunulghan tunji parlamént bolup qalghan.

Samu'él kogolati ilgiri bélgiye parlaméntining xitayning Uyghurlargha tutqan mu'amilisini “Irqiy qirghinchiliq” dep étirap qilishidimu halqiliq rol oynighan idi. Samu'él kogolati féysbukta élan qilghan bu heqtiki uchurida: “Bizning jaza qanunimizda qul emgiki mehsulatlirining import qilinishini cheklesh üchün stéfan fon hék bilen bu qanun layihesini ‍imzalighanliqimizdin iptixarlinimen,” dep körsetken. U yene mundaq dégen: “21-Esirde dölet halqighan shirketlerning yenila xitaydiki Uyghur mejburiy emgek lagérlirida ishlepchiqirilghan mayka yaki kon'go démokra'ik jumhuriyitidiki bala qullar qézip chiqarghan kobalitlarni cheklimey hazirmu import qilishi kishini échinduridu.”

Melum bolushiche, eger bu qanun layihesi bélgiye parlaménti teripidin maqullansa, mejburiy emgek mehsulatlirini bilip turup bélgiyege import qilghanlar bir yildin besh yilghiche qamaqqa höküm qilinidiken. Mezkur qanun layihesi xitay bilen bélgiye bu yil 2-ayda qeshqer bilen bélgiyening soda merkizi léj otturisida awi'atsiye yük transport yoli échip arqidinla otturigha qoyulghan. Mezkur awi'atsiye yük transiport yoli xelq'ara parlaméntlar ara xitay birleshmisining liniyesining tenqidige uchrighan idi.