Белгийә һөкүмәт торини тәминлигүчи ширкәт кәң көләмлик тор һуҗумиға учриған

Мухбиримиз җәвлан
2021-05-04
Share

Белгийә таратқулириниң хәвәр қилишичә, йеқинда белгийә һөкүмәт торини тәминлигүчи ширкәт кәң даирилик DDoS (тарқақ шәкиллик тор мулазимитини рәт қилиш) һуҗумиға учриған болуп, шу сәвәбтин барлиқ испат аңлаш йиғинлири бикар қилинған. Буниң ичидә хитайниң җинайәтлирини "ирқий қирғинчилиқ" дәп бекитиш тоғрулуқ елип берилидиған испат аңлаш йиғиниму бар икән.

Хәвәрдә ейтилишичә, бу тор һуҗуми Belnet ториға қилинған кәң көләмлик хаккерлиқ һуҗуми болуп, үчинчи тәрәп бу торға зор миқдарда санлиқ мәлуматларни йоллап, мулазиметир йүкиниң һәддидин артуқ ешип кетиши вә шу сәвәбтин торниң паләч һалға чүшүп қелишини кәлтүрүп чиқарған. Нәтиҗидә Belnet ториға уланған 200 нәччә органниң тори наһайити астилап кәткән, һәтта киргили болмиған. Буниң ичидә мәмурийәт, университет вә тәтқиқат органлириниң тори бар икән. Нөвәттә бу һуҗумниң сәвәби техи ениқ әмәс икән.

Ишәнчлик хәвәр мәнбәлиригә қариғанда, бу тор һуҗуми түпәйлидин келәр сәйшәнбә күни чүштин кейин белгийә авам палатасида өткүзүлидиған йиғин бикар қилинған. Бу йиғин мәзкур парламент ташқий мунасивәт комитетиниң уйғурларға мунасивәтлик испат аңлаш йиғини болуп, хитайниң уйғурларға йүргүзүватқан җинайәтлирини "ирқий қирғинчилиқ" дәп бекитиш һәққидә музакирә елип берилидикән. Корона вируси түпәйлидин бу йиғин торда елип берилидиған болғачқа, парламент әзалириниң келәр сәйшәнбә күни тор арқилиқ көрүшүши тосқунлуққа учриған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт