Bélgiye parlaménti "Uyghur qirghinchiliqi" ni resmiy étirap qildi

Muxbirimiz eziz
2021-06-15
Share
Bélgiye parlaménti Bélgiye parlaménti aldigha ésilghan bélgiye bayriqi. 2016-Yili 24-mart, biryussél.
REUTERS

Uyghur diyaridiki siyasiy basturush we zor kölemlik tutqunning irqiy qirghinchiliqqa kötürülgenliki deslepki qedemde étirap qilinishqa bashlighandin buyan bélgiye parlaméntimu buninggha resmiy awaz qoshti. 15-Iyun küni bélgiye parlaménti mutleq üstün awaz bilen Uyghurlarning duch kéliwatqan ré'alliqning "Insaniyetke qarshi jinayet" hemde "Éghir qirghinchiliq" ikenlikini étirap qilip, "Uyghur qirghinchiliqi" ni resmiy étirap qilghan dunyadiki altinchi parlamént bolup qaldi.

Mezkur étirap herikiti öz nöwitide yene bélgiye parlaméntini xitay bilen imzalighan "Jinayetchilerni ötküzüp bérish kélishimi" ni bikar qilishqa hemde alliqachan tonglitiwétilgen "Yawropa-xitay öz'ara meblegh sélish kélishimi" ni qayta qarap chiqish urunushini toxtitishqa chaqirdi.

"Firansiye birleshme agéntliqi" ning 15-iyundiki xewiride éytilishiche, bu qétimqi awaz bérish lagér shahiti qelbinur sidiq bélgiye parlaméntigha qarashliq tashqi ishlar komitétining guwahliq yighinida lagérlar heqqide guwahliq bergendin kéyinla bashlan'ghan. Bélgiye parlaméntining "Uyghur qirghinchiliqi" ni étirap qilishidin kéyin herqaysi teshkilatlar we hökümetler buninggha oxshimighan shekilde inkas qayturghan. Dunya Uyghur qurultiyining re'isi dolqun eysa bu qararni qizghin alqishlaydighanliqini bildürüp: "Bu hal yawropa ittipaqigha eza bashqa döletlerningmu bu heqqaniy heriketke awaz qoshushigha janliq rewishte türtke bolghusi" dégen.

Bélgiye parlaméntining ezaliridin samu'él kogolati bu heqte söz qilip؛ "Dunya emdi xitay hökümitining Uyghurlargha némilerni qiliwatqanliqi heqqide asta-asta uyqusini échishqa bashlidi" dégen.

Ötken hepte chéx parlaménti 0 ge qarshi 38 awaz bilen "Uyghurlar irqiy qirghinchiliqqa uchrawatidu. Bu insaniyetke qarshi jinayet" dégen tarixiy hökümni maqullighanidi. Nöwette téximu köp döletlerning bu xildiki qararlarni élishi ümid qilinmaqtiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet