Bélgiye parlaméntining xitayning Uyghurlargha yürgüziwatqan irqiy qirghinchiliqini étirap qilishi xitay hökümitining oghisini qaynatqan

Muxbirimiz jewlan
2021-06-16
Share

15-Iyun küni bélgiye parlaménti xitay hökümitining Uyghurlargha élip barghan qebih basturushini "Insaniyetke qarshi jinayet" dep békitti, shuning bilen bélgiye bu irqiy qirghinchiliqni étirap qilghan amérika, kanada, gollandiye, en'giliye, litwa we chéx jumhuriyetliridin kéyinki 7-dölet bolup qaldi. Xitay hökümiti qaysi dölet bu irqiy qirghinchiliqni étirap qilsa shuninggha hujum qilishni dawam qilip kéliwatqan bolup, qétim tigh uchini béligiyege qaratqan.

Fransiye agéntliqining xewer qilishiche, xitay tashqiy ishlar ministirliqining bayanatchisi jaw lijyen bélgiye parlaméntining bu qararini yenila xitayning qélipliship qalghan diplomatik tili boyiche "Shinjangning jem'iyet muqimliqigha buzghunchiliq qilghanliq, xitayning tereqqiyatigha tosqunluq qilghanliq" dep eyibligen.

Bélgiye parlamént ezasi samu'él kogolati xitayning Uyghurlargha yürgüzüp kéliwatqan jinayitini qattiq eyiblep, uni irqiy qirghinchiliq dep békitish teklipini bélgiye parlaméntigha sun'ghan muhim shexstur. U bu qétim u jaw lijyenning asasliq hujum nishanigha aylan'ghan, jawlijiyen uni "Yalghan we saxta uchurlarni yaman gherezde tarqitip, xitayning igilik hoquqi we menpe'etini éghir ziyan'gha uchratti," dep qarilighan hemde uni "Bélgiye bilen xitayning munasiwetlirige ziyankeshlik qilmasliq" heqqide agahlandurghan.

Tehlilchilerning qarishiche, bélgiye parlaméntining bu qarari "7 Dölet ittipaqi" rehberliri uchrishishidin kéyinki waqitqa toghra kelgen bolup, mezkur ittipaqning birleshme bayanat élan qilip xitayni kishilik hoquq we erkinlikke, bolupmu Uyghur rayonidiki kishilik hoquq we erkinlikke hörmet qilishqa chaqiriq qilishi xitayni sarasimige salghan bolsa, arqidinla yawropaning siyasiy merkezliridin biri bolghan bélgiyening bu qararni chiqirishi xitayning téximu oghisini qaynatqan. Xitayning bélgiye parlaméntining bu qararini eyiblishini melum jehettin "7Dölet ittipaqi" ning birleshme bayanatigha qaritilghan déyishkimu bolidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet