Белгийә даирилири: «биз кичик дөләт, уйғурларни дәп хитайниң чишиға тегәлмәймиз»

Мухбиримиз әркин
2019-06-14
Елхәт
Пикир
Share
Принт

Белгийә ташқи ишлар министирлиқи белгийәниң бейҗиңда турушлуқ әлчиханисидин бир уйғур аилисини хитай сақчилириға тутуп бәргәнликини ақлап, белгийәниң кичик дөләт икәнлики, уларни дәп хитайниң чишиға тегишкә җүрәт қилалмайдиғанлиқини билдүргән.

Өткән йили белгийәдә сиясий панаһлиққа еришкән аблимит турсун исимлик бир уйғур йеқинда өзиниң үрүмчидики аяли билән 4 пәрзәнтини белгийәгә тәклип қилған. Лекин униң аилисидикиләр бейҗиңдики белгийә әлчиханисиға көчмәнләр визисиға илтимас қилиш үчүн барғандин кейин хитай сақчилири үрүмчигә қайтуруп кәткән. Мәлум болушичә, белгийә әлчиханиси аблимитниң аяли вә пәрзәнтлириниң әлчиханида қоғдиниш тәлипини рәт қилип, уларни хитай сақчилириға хәвәр қилған. Белгийәниң бейҗиңда турушлуқ әлчиханиси вә белгийә ташқи ишлар министирлиқи радийомиз мухбирлириниң бу вәқә һәққидики соаллириға җаваб беришни изчил рәт қилип кәлгәниди.

Белгийәлик мутәхәссисләр ванесса франгивел вә руне стенбергларниң 14‏-июн күни америкадики «ташқи сиясәт» журнилида елан қилған бу һәқтики хәвиридә ашкарилинишичә, вәқәдин кейин белгийә ташқи ишлар министирлиқи әмәлдарлири аблимит турсун билән сөһбәт өткүзүп, униң аяли һөрийәтгүл абланиң белгийәниң мәмурий рәсмийәтлирини хата чүшинивалғанлиқи, униң әлчиханидин айрилишни рәт қилип, әлчиханиниң амалсиз сақчи чақиртип келишкә мәҗбур болғанлиқини илгири сүргән. Хәвәрдә қәйт қилинишичә, даириләр аблимит турсунниң униң аилисиниң мәсилисини дипломатик күнтәртипкә елиш тоғрисидики тәлипини рәт қилған. Шуниңдәк йәнә белгийәниң «бу ишқа ашкара көңүл бөлидиғанлиқини ипадилиши хитайға еғир бесим қилидиғанлиқи», «бу вәқәни хитай билән болған тоқунушқа айландуруштин сақлинишниң белгийәдәк кичик дөләт үчүн ақиланә болидиғанлиқи» ни билдүргән. Хәвәрдә, явропаниң уйғурларни қоғдаш үчүн техиму актип болуши, һөрийәтгүл абланиң вәқәсидә көрүлгәндәк бу хил һамақәтлик вә рәһимсизликниң қайта йүз бәрмәсликигә капаләтлик қилиши тәләп қилинған.

Мәлум болушичә, нөвәттә аблимит турсунниң аилиси билән болған алақиси пүтүнләй үзүлгән. Униң аяли пәрзәнтлириниң ақивитиниң қандақ болғанлиқи мәлум әмәс икән.

Толуқ бәт