Bélgiye da'iriliri: "Biz kichik dölet, Uyghurlarni dep xitayning chishigha tégelmeymiz"

Muxbirimiz erkin
2019-06-14
Élxet
Pikir
Share
Print

Bélgiye tashqi ishlar ministirliqi bélgiyening béyjingda turushluq elchixanisidin bir Uyghur a'ilisini xitay saqchilirigha tutup bergenlikini aqlap, bélgiyening kichik dölet ikenliki, ularni dep xitayning chishigha tégishke jür'et qilalmaydighanliqini bildürgen.

Ötken yili bélgiyede siyasiy panahliqqa érishken ablimit tursun isimlik bir Uyghur yéqinda özining ürümchidiki ayali bilen 4 perzentini bélgiyege teklip qilghan. Lékin uning a'ilisidikiler béyjingdiki bélgiye elchixanisigha köchmenler wizisigha iltimas qilish üchün barghandin kéyin xitay saqchiliri ürümchige qayturup ketken. Melum bolushiche, bélgiye elchixanisi ablimitning ayali we perzentlirining elchixanida qoghdinish telipini ret qilip, ularni xitay saqchilirigha xewer qilghan. Bélgiyening béyjingda turushluq elchixanisi we bélgiye tashqi ishlar ministirliqi radiyomiz muxbirlirining bu weqe heqqidiki so'allirigha jawab bérishni izchil ret qilip kelgenidi.

Bélgiyelik mutexessisler wanéssa fran'giwél we runé sténbérglarning 14‏-iyun küni amérikadiki "Tashqi siyaset" zhurnilida élan qilghan bu heqtiki xewiride ashkarilinishiche, weqedin kéyin bélgiye tashqi ishlar ministirliqi emeldarliri ablimit tursun bilen söhbet ötküzüp, uning ayali höriyetgül ablaning bélgiyening memuriy resmiyetlirini xata chüshiniwalghanliqi, uning elchixanidin ayrilishni ret qilip, elchixanining amalsiz saqchi chaqirtip kélishke mejbur bolghanliqini ilgiri sürgen. Xewerde qeyt qilinishiche, da'iriler ablimit tursunning uning a'ilisining mesilisini diplomatik küntertipke élish toghrisidiki telipini ret qilghan. Shuningdek yene bélgiyening "Bu ishqa ashkara köngül bölidighanliqini ipadilishi xitaygha éghir bésim qilidighanliqi", "Bu weqeni xitay bilen bolghan toqunushqa aylandurushtin saqlinishning bélgiyedek kichik dölet üchün aqilane bolidighanliqi" ni bildürgen. Xewerde, yawropaning Uyghurlarni qoghdash üchün téximu aktip bolushi, höriyetgül ablaning weqeside körülgendek bu xil hamaqetlik we rehimsizlikning qayta yüz bermeslikige kapaletlik qilishi telep qilin'ghan.

Melum bolushiche, nöwette ablimit tursunning a'ilisi bilen bolghan alaqisi pütünley üzülgen. Uning ayali perzentlirining aqiwitining qandaq bolghanliqi melum emes iken.

Toluq bet