Хитайниң 2022-йиллиқ қишлиқ олимпик мусабиқисини өткүзүшигә қарши қол қоюш һәрикити қоллашқа еришти

Мухбиримиз ирадә
2019-12-05
Share

Хитай һөкүмитиниң уйғур елидә йолға қойған йиғивелиш лагерлириға қарши туруш үчүн униң 2022-йиллиқ қишлиқ олимпик мусабиқисини өткүзүшигә қарши туруш чақириқлири күчәймәктә.

Дуняниң һәрқайси җайлиридики яш уйғур паалийәтчилириниң ортақ һәрикәткә келиши билән "өзгириш" намлиқ тор бәттә "һоқуқ болмиса, олимпик мусабиқисиму болмайду" мавзулуқ имза қоюш һәрикити башланған иди.

5-Декабир күни бу имза қоюш һәрикитигә қол қойғанлар сани 27 миңдин ашқан болуп, 35 миң кишилик нишанға йетишкә аз қалған.

Мәзкур қол қоюш һәрикитиниң чақириқи уйғур, инглиз, хитай, түрк, япончә вә һиндонезийәчидин ибарәт 6 хил тилда елан қилинған. Чақириқта мунулар дейилгән:

"олимпик тәнһәрикәт йиғининиң роһи болса әң негизлик болған әхлақ принсиплириға йол қоюш вә һөрмәт қилиш, тәнтәрбийә һәрикәтлирини инсанларниң тинч һалда бирликтә тәрәққий қилишини илгири сүрүшкә хизмәт қилдуруп, инсанларниң һоқуқини қоғдайдиған баравәр җәмийәт бәрпа қилишни илгири сүрүштүр. . . Әгәр хитай җаза лагерлирини 2022-йилиғичә давам қилдурса, ундақта бейҗиңниң һечқандақ олимпик тәнһәрикәт йиғини өткүзүш һоқуқи болмайду. Бийҗиңниң таллиши наһайити асан: яки нәччә йүзлигән җаза лагерлирини тақиши керәк яки олимпик тәнһәрикәт йиғини өткүзүштин ваз кечиши керәк".

Америка җумһурийәтчи кеңәш палата әзаси рик скотму, хитайниң кишилик һоқуқ дәпсәндичилики вә америка дөләтлик васкетбол җәмийити NBA ға тутқун муамилиси сәвәблик 2022‏-йиллиқ қишлиқ олимпик мусабиқисини өткүзүш һәққиниң бикар қилиниши керәкликини билдүргән иди.

"америка кәсипләр институти" тәтқиқат мәркизиниң тәтқиқатчиси майкил мазза 2-декабир күни "лос анҗелис вақти" гезитидә мақалә елан қилип "әгәр америка хитайни ғәлибилик һалда шинҗаңдики сиясәтлирини юмшитишқа көндүримән, дәйдикән у һалда улар ши җинпиңни биваситә нишанға елип, бейҗиңниң 2022-йиллиқ қишлиқ олимпик мусабиқиси өткүзүш мәсилисини козир қилиш арқилиқ бейҗиңға бесим ишлитиши керәк" дегән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт