Amérika prézidénti jow baydén ukra'inagha tajawuz qilghan rusiyege yéngi jaza tedbirlirini élan qildi

Muxbirimiz irade
2022-02-24
Share

Amérika prézidénti jow baydén 24-féwral peyshenbe küni ukra'inagha tajawuz qilghan rusiyege qarita yéngi jaza tedbirlirining qoyulidighanliqini élan qildi.

Prézidént baydén rosiye ukra'inagha shu yer waqti peyshenbe seherde hujum qozghighandin kéyin, aqsaraydin qilghan tunji nutuqida mundaq dégen: “Putin tajawuzchidur, bu urushni putin tallidi. Shunga u we uning döliti barliq aqiwetke mes'ul bolushi kérek”.

CNN Téléwiziyesining xewer qilishiche, prézidént baydén élan qilghan yéngi jaza tedbirliri rosiye bankisi qatarliq 4 bankini jazalash, ularning mal-mülkini tonglitilish, amérika we yawropaning rusiyege salidighan mebleghlirini toxtitish, yenimu köpligen ros emeldarlirigha jaza tedbiri qoyush we pen-téxnika cheklimisi qoyush qatarliqlarni öz ichige alidiken. Xewerde bu jaza tedbirining rosiyening iqtisadiy we herbiy sana'itige éghir zerbe béridighanliqi ilgiri sürülgen.

Baydén yene shimaliy atlantik ehdi teshkilati quruqluq we hawa qisimlirining sherqiy yawropagha yéngiwashtin orunlashturulghanliqini élan qilghan. Emma u amérika armiyesining ukra'inada urushqa qatnashmaydighanliqini eskertken.

Rosiye qisimliri amérika we yawropa ittipaqining küchlük agahlandurushlirigha qarimay peyshenbe küni seherde ukra'inagha hujum qozghighan idi. Rusiye eskerlirining shimal we jenubiy tereplerdin chégradin bösüp ötkenliki, paytext kiyéwni öz ichige alghan bir qanche sheherlerde partlashlarning yüz bergenliki xewer qilin'ghan idi.

Putinning ukra'inagha qaratqan bu hujumi amérika we yawropa elliri teripidin “Tajawuzchiliq” dep qaralghan we qattiq eyiblen'gen. Emma mushundaq bir peytte xitay hökümitining rosiyening bu herbiy herikitini “Tajawuz” yaki “Ishghal” dep atimasliqi küchlük diqqet qozghidi.

Xitay tashqiy ishlar ministérliqining bayanatchisi xu'a chunying 24-féwral küni muxbirlarning bu heqtiki so'aligha jawab bergende: “Biz buninggha derhal baha bermeymiz. Xitay eng yéngi weziyetni yéqindin közitiwatidu. . . Tajawuzchiliqning éniqlimisigha kelsek, méningche, biz ukra'inaning hazirqi weziyitige qandaq qarishimiz kéreklikini bahalishimiz kérek. Hemme adem étirap qilishni xalimisimu, ukra'ina mesilisining bashqa intayin murekkep tarixiy arqa körünüshi bar,” dégen. U hetta rosiyening ukra'inagha kirishide amérikaning “Gunahi” barliqini ilgiri sürgen.

Tiwittér qatarliq ijtima'iy taratqularda xitayning bu pozitsiyesi qattiq eyiblenmekte. Nurghun tehililchiler xitayning rosiyening ukra'inagha tajawuz qilishini qollap kelgenlikini ilgiri sürmekte. Nopuzluq gézitlerdin “Maliye waqti géziti” bügünki bir maqaliside, xitayning rosiyeni iqtisadiy jehettin qollap, amérika we yawropaning rusiyege qaritidighan kelgüsi iqtisadiy jazalirigha qarshi qoghdashqa teyyarliq qiliwatqanliqini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet