Җов байден “русийә G-20 дөләтлири гәвдисидин чиқириветилиши керәк” дегән

Мухбиримиз ирадә
2022-03-24
Share

24-Март күни америка президенти җов байден шималий атлантик әһди тәшкилати (NATO) дөләтлири башлиқлириниң украина вәзийтигә алақидар җиддий йиғиниға қатнашқан. Президент җов байден сөзидә: “әгәр русийә украинада кәң көләмлик қирғучи қорал ишләтсә, шималий атлантик әһди тәшкилати буниңға тәң қәдәмдә җаваб қайтуриду,” дәп агаһландурған.

Җов байден берюсселда явропа иттипақи, G-7 дөләтлири рәһбәрлири вә шималий атлантик әһди тәшкилатидики иттипақдашлири билән бир қатар җиддий учришишларда болған.

Ройтерс агентлиқиниң хәвәр қилишичә, у бу учришишларда қилған сөзидә, русийәниң G-20 дөләтлири иқтисадий гәвдисидин қоғлап чиқирилиши керәкликини вә бу тиришчанлиқни қоллайдиғанлиқини билдүргән. Бирақ американиң мәйдани русийәниң G-20 дин чиқириветилишигә қарши болған хитайға бесим пәйда қилидикән.

Җов байден шу күни мухбирларниң хитайниң русийәгә ярдәм қилғанлиқи вә американиң юқири техникалиқ үскүнилирини русийәгә сетивәткәнликигә аит пакит бар-йоқлуқи һәққидики соалиға җаваб бәрмигән.

Байден сөзидә: “мениңчә, хитай өзиниң иқтисадий кәлгүсиниң русийәгә қариғанда ғәрб билән техиму қоюқлиқини чүшиниду,” дегән.

Мәлум болушичә, бу учришишларда русийәниң химийәлик қорал ишлитиш еһтималиға қарши тәдбирләр бәлгиләнгән болуп, NATO ниң баш секретари җенс столтенберг (Jens Stoltenberg) мухбирларға қилған сөзидә: “шималий атлантик әһди тәшкилати йеқинда украинани химийәлик, биологийәлик, радиологийәлик, шундақла ядро қораллиридин мудапийәлиниш үскүнилири билән тәминләйду,” дегән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт