Байден һөкүмитиниң тәйвәнгә қорал сетип бериш пилани хитайни қаттиқ биарам қилған

Мухбиримиз әркин
2021-08-06
Share

Американиң байден һөкүмити тәйвәнгә 750 милйон долларлиқ қорал сетип бериш пиланини америка дөләт мәҗлисигә сунған. Анализчиларниң көрситишичә, байден һөкүмитиниң қарари хитайни техиму биарам қилип, американиң униң билән хоңкоң вә уйғур "ирқий қирғинчилиқи", җәнубий деңиз қатарлиқ мәсилиләр түпәйли өткүрлишип кәткән мунасивәтлирини техиму җиддийләштүридикән.

Америка ташқи ‍ишлар министирлиқи баянатчисиниң билдүрүшичә, байден һөкүмити 4-авғуст күни мәзкур пиланини дөләт мәҗлисигә рәсмий уқтурған. Мәлум болушичә, бу сода M109A6 типлиқ 40 танә зәмбирәк сетип беришни ‍өз ичигә алидикән. Америка ташқи ишлар министирлиқиниң баянатчиси, "әгәр бу сода хуласиләнсә бу тәйвән зәмбирәкчи қисимлириниң заманивилишишиға түрткә болиду. Униң ‍өзини қоғдап, һазирқи вә кәлгүси тәһдитләргә тақабил туруш иқтидарини ашуриду" дегән.

Көзәткүчиләрниң ейтишичә, америка дөләт мәҗлисиниң мәзкур қорал содисини тәстиқлишида гәп йоқ икән. Вәқәдин хәвәрдар бирәйләнниң с н н гә америка кеңәш палатаси ташқи ишлар комитети рәиси роберт менәндәзниң бу содини "байден һөкүмитиниң һинди-тинч окян истратегийәси вә иттипақдиши тәйвәнни қоғдаш вәдисидә туридиғанлиқиниң намайәндиси" дәп қарайдиғанлиқини ейтқан.

Хитай болса байден һөкүмитиниң бу қарариға қарита "вәзийәтниң тәрәққиятиға қарап, мувапиқ вә зөрүр тәдбирләр" ни алидиғанлиқи, бу содиниң "тәйвән мустәқилчи күчлири" гә хата сигнал беридиғанлиқи, "америка-хитай мунасивәтлиригә, тәйвән боғузиниң тинчлиқи вә муқимлиқиға дәхли йәткүзидиғанлиқи" ни ейтқан. Америка һөкүмити бу қоралларни хитайниң тәйвәнгә қораллиқ һуҗум қилиш хәвпи күнсери күчийиватқан бир вақитта сатидиғанлиқини билдүргәниди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт