Baydén hökümitining teywen'ge qoral sétip bérish pilani xitayni qattiq bi'aram qilghan

Muxbirimiz erkin
2021-08-06
Share

Amérikaning baydén hökümiti teywen'ge 750 milyon dollarliq qoral sétip bérish pilanini amérika dölet mejlisige sun'ghan. Analizchilarning körsitishiche, baydén hökümitining qarari xitayni téximu bi'aram qilip, amérikaning uning bilen xongkong we Uyghur "Irqiy qirghinchiliqi", jenubiy déngiz qatarliq mesililer tüpeyli ötkürliship ketken munasiwetlirini téximu jiddiyleshtüridiken.

Amérika tashqi ‍ishlar ministirliqi bayanatchisining bildürüshiche, baydén hökümiti 4-awghust küni mezkur pilanini dölet mejlisige resmiy uqturghan. Melum bolushiche, bu soda M109A6 tipliq 40 tane zembirek sétip bérishni ‍öz ichige alidiken. Amérika tashqi ishlar ministirliqining bayanatchisi, "Eger bu soda xulasilense bu teywen zembirekchi qisimlirining zamaniwilishishigha türtke bolidu. Uning ‍özini qoghdap, hazirqi we kelgüsi tehditlerge taqabil turush iqtidarini ashuridu" dégen.

Közetküchilerning éytishiche, amérika dölet mejlisining mezkur qoral sodisini testiqlishida gep yoq iken. Weqedin xewerdar bireylenning s n n ge amérika kéngesh palatasi tashqi ishlar komitéti re'isi robért ménendezning bu sodini "Baydén hökümitining hindi-tinch okyan istratégiyesi we ittipaqdishi teywenni qoghdash wediside turidighanliqining namayendisi" dep qaraydighanliqini éytqan.

Xitay bolsa baydén hökümitining bu qararigha qarita "Weziyetning tereqqiyatigha qarap, muwapiq we zörür tedbirler" ni alidighanliqi, bu sodining "Teywen musteqilchi küchliri" ge xata signal béridighanliqi, "Amérika-xitay munasiwetlirige, teywen boghuzining tinchliqi we muqimliqigha dexli yetküzidighanliqi" ni éytqan. Amérika hökümiti bu qorallarni xitayning teywen'ge qoralliq hujum qilish xewpi künséri küchiyiwatqan bir waqitta satidighanliqini bildürgenidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet