Президент байден хитайниң талибанлар билән келишим түзүшкә һәрикәт қилишиниң ениқ икәнликини билдүргән

Мухбиримиз әркин
2021-09-08
Share

Америка президенти байден хитайниң 15-авғусттин бери афғанистанда һакимийәтни тартивалған талибанлар билән келишим түзүшкә һәрикәт қилишиниң ениқ икәнликини билдүргән. Ройтерс агентлиқиниң хәвәр қилишичә, байден бу сөзләрни 7-сентәбир күни мухбирларниң хитайниң америка қанунлири тәрипидин чәкләшкә учриған талибанларға мәбләғ селишидин әндишә қилидиған-қилмайдиғанлиқи һәққидики суалиға җаваб бәргәндә ейтқан.

У мундақ дегән: "хитайниң талибанлар билән реал мәсилиси мәвҗут. Шуңа хитайниң худди пакистан, русийә вә иран қатарлиқ дөләтлар қилғандәк, талибанлар билән келишим түзүшкә һәрикәт қилидиғанлиқи ениқ. Уларниң һәммиси немә иш қилиш керәкликини айдиңлаштурушқа тиришмақта."

Америка 14-авғусттин башлап ‍афғанистандин әскәр чекиндүрүшкә башлиғандин кейин, хитай дәрһал һәрикәткә ‍өтүп, ‍әгәр талибанлар уйғурларни қоллимиса, уларға иқтисадий ярдәм беридиғанлиқи, афғанистанниң қайта қурулушиға мәбләғ салидиғанлиқини елан қилған. Талибанлар дәрһал баянат елан қилип, хитайниң ичкий ишлириға арлашмайдиғанлиқи, һәрқандақ чәт әл тәшкилатиниң афғанистанни база қилип башқа дөләткә қарши турушиға йол қоймайдиғанлиқини җакалиған иди.

Америка афғанистандин чекиниш билән бир вақтта, санаәтләшкән 7 дөләт өзлириниң талибанларға қаратқан һәркитини бирликкә кәлтүргән. Америка афғанистанниң ню-йорк федирал хәзинәсидики ташқий перивутини тоңлитип, буни уларға бериш-бәрмәсликни талибанларниң аяллар һоқуқи вә хәлқара қанунларға һөрмәт қилиш-қилмаслиқиға бағлиған иди. Бирақ ройтерс агентлиқиниң ейтишичә, мутәхәсиссләр әгәр хитай, русийә вә башқа дөләтләр талибанларни мәбләғ билән тәминләшкә башлиса, бу американиң қолидики иқтисадий козерни аҗизлитиши мумкин, дәп қарайдикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт