Җов байденниң ениргийә пиланида һалқилиқ рол ойнайдиған қуяш ениргийәси тахтиси хитайдики мәҗбурий әмгәк билән четишлиқ икән

• Ихтиярий мухбиримиз җәвлан
  2021-05-14

Мәлуматларға қариғанда, өткән 20 йилда уйғур райони хитайниң пүтүн дуняға қуяш ениргийәси тахтисиға керәклик материял вә запчасларни ишләпчиқиридиған асаслиқ базисиға айланған болуп, йеңи тәкшүрүшләргә асасланғанда, бу райондики уйғур вә башқа аз санлиқ милләтләр бу санаәтниң ғоллуқ әмгәк күчлиригә айланған, әмма бу кишиләр еғир булғиниш пәйда қилидиған ишләпчиқириш линийәсидә хитай тәрипидин қул орнида ишлитилмәктә икән.

CNN Ториниң хәвәр қилишичә, җүмә күни (14-май) елан қилинған “парлақ күн нурида: уйғур мәҗбурий әмгики вә йәр шари қуяш ениргийәси мал тәминләш линийәси” намлиқ доклатта көрситилишичә, пакиз ениргийәгә мунасивәтлик материял вә запчаслар булғинишчан көмүр вә мәҗбурий әмгәк арқилиқ ишләпчиқирилған болуши мумкин икән.

Мәлуматларға қариғанда, қуяш ениргийәси тахтиси ясаш үчүн куартиз, йерим өткүзгүч маддиси болған металлашқан силтисий, бирикмә силтисий, қәләй, пластинка (непиз қәвәт) қатарлиқ материяллар керәклик болуп, буниң ичидә һава булғаш дәриҗиси әң еғир болған куартиз вә металлашқан силтисий ишләпчиқириш һалқиси мәҗбурий әмгәк билән четишлиқ икән.

Хәвәрдә билдүрүлүшичә, қуяш ениргийәси байдин һөкүмитиниң пакиз ениргийә сияситиниң негизлик һалқиси болуп, президент җов байден америкадики 2035-йилғичә давамлишидиған пакиз ениргийә қурулуши үчүн 2 тирилйон доллар аҗритиш тәклипини оттуриға қойған. Шундақ болғанда һәр қайси шитатлардики ток ишләпчиқириш базилири келимат өзгириши пәйда қилидиған булғинишни түгитәләйдикән. Һалбуки, бу пилан қуяш ениргийәси вә шамал ениргийәсигә сәрп қилидиған чиқимни бир һәссә өрлитидикән.

 Мутәхәсисләрниң билдүрүшичә, қуяш ениргийәсигә болған еһтияҗ вә чиқимниң ешип бериши хитайдики қуяш ениргийәси тахтиси ишләпчиқиришини техиму тезлитидикән вә буниңға четишлиқ мәҗбурий әмгәкни тохтитиш һәрикитини қийинлаштуридикән.