Jow baydénning énirgiye pilanida halqiliq rol oynaydighan quyash énirgiyesi taxtisi xitaydiki mejburiy emgek bilen chétishliq iken

• Ixtiyariy muxbirimiz jewlan
  2021-05-14

Melumatlargha qarighanda, ötken 20 yilda Uyghur rayoni xitayning pütün dunyagha quyash énirgiyesi taxtisigha kéreklik matériyal we zapchaslarni ishlepchiqiridighan asasliq bazisigha aylan'ghan bolup, yéngi tekshürüshlerge asaslan'ghanda, bu rayondiki Uyghur we bashqa az sanliq milletler bu sana'etning gholluq emgek küchlirige aylan'ghan, emma bu kishiler éghir bulghinish peyda qilidighan ishlepchiqirish liniyeside xitay teripidin qul ornida ishlitilmekte iken.

CNN Torining xewer qilishiche, jüme küni (14-may) élan qilin'ghan “Parlaq kün nurida: Uyghur mejburiy emgiki we yer shari quyash énirgiyesi mal teminlesh liniyesi” namliq doklatta körsitilishiche, pakiz énirgiyege munasiwetlik matériyal we zapchaslar bulghinishchan kömür we mejburiy emgek arqiliq ishlepchiqirilghan bolushi mumkin iken.

Melumatlargha qarighanda, quyash énirgiyesi taxtisi yasash üchün ku'artiz, yérim ötküzgüch maddisi bolghan métallashqan siltisiy, birikme siltisiy, qeley, plastinka (népiz qewet) qatarliq matériyallar kéreklik bolup, buning ichide hawa bulghash derijisi eng éghir bolghan ku'artiz we métallashqan siltisiy ishlepchiqirish halqisi mejburiy emgek bilen chétishliq iken.

Xewerde bildürülüshiche, quyash énirgiyesi baydin hökümitining pakiz énirgiye siyasitining négizlik halqisi bolup, prézidént jow baydén amérikadiki 2035-yilghiche dawamlishidighan pakiz énirgiye qurulushi üchün 2 tirilyon dollar ajritish teklipini otturigha qoyghan. Shundaq bolghanda her qaysi shitatlardiki tok ishlepchiqirish baziliri kélimat özgirishi peyda qilidighan bulghinishni tügiteleydiken. Halbuki, bu pilan quyash énirgiyesi we shamal énirgiyesige serp qilidighan chiqimni bir hesse örlitidiken.

 Mutexesislerning bildürüshiche, quyash énirgiyesige bolghan éhtiyaj we chiqimning éship bérishi xitaydiki quyash énirgiyesi taxtisi ishlepchiqirishini téximu tézlitidiken we buninggha chétishliq mejburiy emgekni toxtitish herikitini qiyinlashturidiken.