Биңтуәнниң ролини «яхши җари қилдуруш» чақириқи гуман қозғимақта

Мухбиримиз әзиз
2019-01-16
Елхәт
Пикир
Share
Принт

2019-Йилиниң бешидила уйғур аптоном райониға тәвә болған бир қисим мәмурий вә қанун иҗра қилишқа даир һоқуқлар, җүмлидин чоң йол қатниши, аманлиқ вә от өчүрүшни башқуруш хизмити қатарлиқ 150 хилға йеқин мәмурий һоқуқ биңтуәнгә өткүзүп берилгән иди. «Шинҗаң гезити» ниң 16-январдики санида болса «баш нишанни чөридигән һалда биңтуәнниң пәвқуладдә ролини техиму яхши җари қилдурайли» сәрләвһисидә мәхсус мақалә елан қилинип, буниңға мунасивәтлик бәзи әһваллар йәнә бир қетим алаһидә тәкитләнди.

Хәвәрдә ейтилишичә, уйғур аптоном районлуқ 13-нөвәтлик хәлқ қурултийиниң 2-омуми йиғиниға қатнишиватқан биңтуән вәкилләр өмики биңтуән парткоминиң секретари сун җинлоңниң башламчилиқида мушу һәқтики әһвалларни гуруппа музакирисидә нуқтилиқ музакирә қилған. Сун җинлоң бу һәқтә сөз қилип «биңтуән буниңдин кейинки хизмәттә ши җинпиңниң ‹йеңи дәврдики җуңгочә алаһидиликкә игә сотсиялизм идийәси' ни йетәкчи идийә қилиду» дегән. Шуниңдәк буниңдин кейинки хизмәтләрдә уйғур аптоном районлуқ парткомниң бир туташ рәһбәрлики астида «шинҗаң хизмитиниң баш нишанини чөридигән һалда биңтуәнниң пәвқуладдә ролини техиму яхши җари қилдурайли» дәп чақириқ қилған.

Буниңға мас һалда «хитай хәвәрләр тори» 14-январ биңтуәнгә қарашлиқ сақчи қисимлириниң қишлиқ мәшиқ қиливатқанлиқини «уруш қилиш иқтидарини ашуруш мәшиқи» дәп мәхсус хәвәр қилған. Сүрәтлик хәвәрдә һәрбий ишларға лайиһиләнгән учқучисиз айропилан, уруш тәйярлиқиға охшап кетидиған һәрбий мәшиқләр сақчи қисимлириниң мәшиқ шәклидин зор дәриҗидә һалқип кәткән.

Бир қисим анализчилар хитай мәтбуатлиридики «шинҗаң хизмитиниң баш нишани» ни хитай һөкүмитиниң уйғурларни пүтүнләй йоқ қиливетишни көзлигән «ахирқи һәл қилиш чариси», дәп қараватқанлиқи мәлум. Хитай һөкүмити изчил биңтуәнни «шинҗаңниң муқимлиқидики кәм болса болмайдиған күч» дәп тәрипләп келиватқан болуп, биңтуәнниң ролини техиму күчәйтишкә мунасивәтлик бу әһвалларни бәзи анализчилар «буниңдин кейинки бастурушниң техиму қаттиқ болидиғанлиқиниң бешарәтлиридин бири» демәктә.

Пикирләр (0)
Share
Толуқ бәт