Bingtu'enning rolini "Yaxshi jari qildurush" chaqiriqi guman qozghimaqta

Muxbirimiz eziz
2019-01-16
Élxet
Pikir
Share
Print

2019-Yilining béshidila Uyghur aptonom rayonigha tewe bolghan bir qisim memuriy we qanun ijra qilishqa da'ir hoquqlar, jümlidin chong yol qatnishi, amanliq we ot öchürüshni bashqurush xizmiti qatarliq 150 xilgha yéqin memuriy hoquq bingtu'en'ge ötküzüp bérilgen idi. "Shinjang géziti" ning 16-yanwardiki sanida bolsa "Bash nishanni chöridigen halda bingtu'enning pewqul'adde rolini téximu yaxshi jari qildurayli" serlewhiside mexsus maqale élan qilinip, buninggha munasiwetlik bezi ehwallar yene bir qétim alahide tekitlendi.

Xewerde éytilishiche, Uyghur aptonom rayonluq 13-nöwetlik xelq qurultiyining 2-omumi yighinigha qatnishiwatqan bingtu'en wekiller ömiki bingtu'en partkomining sékrétari sun jinlongning bashlamchiliqida mushu heqtiki ehwallarni guruppa muzakiriside nuqtiliq muzakire qilghan. Sun jinlong bu heqte söz qilip "Bingtu'en buningdin kéyinki xizmette shi jinpingning 'yéngi dewrdiki junggoche alahidilikke ige sotsiyalizm idiyesi' ni yétekchi idiye qilidu" dégen. Shuningdek buningdin kéyinki xizmetlerde Uyghur aptonom rayonluq partkomning bir tutash rehberliki astida "Shinjang xizmitining bash nishanini chöridigen halda bingtu'enning pewqul'adde rolini téximu yaxshi jari qildurayli" dep chaqiriq qilghan.

Buninggha mas halda "Xitay xewerler tori" 14-yanwar bingtu'en'ge qarashliq saqchi qisimlirining qishliq meshiq qiliwatqanliqini "Urush qilish iqtidarini ashurush meshiqi" dep mexsus xewer qilghan. Süretlik xewerde herbiy ishlargha layihilen'gen uchquchisiz ayropilan, urush teyyarliqigha oxshap kétidighan herbiy meshiqler saqchi qisimlirining meshiq sheklidin zor derijide halqip ketken.

Bir qisim analizchilar xitay metbu'atliridiki "Shinjang xizmitining bash nishani" ni xitay hökümitining Uyghurlarni pütünley yoq qiliwétishni közligen "Axirqi hel qilish charisi", dep qarawatqanliqi melum. Xitay hökümiti izchil bingtu'enni "Shinjangning muqimliqidiki kem bolsa bolmaydighan küch" dep teriplep kéliwatqan bolup, bingtu'enning rolini téximu kücheytishke munasiwetlik bu ehwallarni bezi analizchilar "Buningdin kéyinki basturushning téximu qattiq bolidighanliqining bésharetliridin biri" démekte.

Toluq bet