Uyghur élidiki bingtu'en bu yil jem'iyettin 1595 neper memur qobul qilidiken

Muxbirimiz nur'iman
2021-03-02
Share

Xitay xewer agéntliqining 2-mart bergen xewirige qarighanda, ishlepchiqirish we qurulush bingtu'eni 2021-yili jem'iyettin 1595 memur qobul qilishni pilanlighanliqini élan qilghan.

Buning ichide bingtu'en organlirigha 65 neper, sheher we rayonlargha 551 neper, türme sistémisigha 100 neper, "Aliy mektep oqughuchilirini terbiyelesh" ornigha 600neper qobul qilinidiken.

Xelq'ara metbu'atlarda xitayning Uyghur rayonidiki türme we lagérlarni dawamliq kéngeytiwatqanliqi ashkarilan'ghan peytte xitay da'irilirining türme sistémisigha yene 100 neper xadim alidighanliqi heqqidiki xewer diqqet qozghimaqta.

Xewerde körsitilishiche yene "Aliy mektep oqughuchilirini terbiyelesh" orunliri uniwérsal bashqurush orunliri bolup, bu orun'gha tizimlatqanlar Uyghur ilining jenubidiki sheher we rayonlirida bir yil terbiyelinidiken. Terbiyelesh mudditi toshqandin kéyin, bingtu'en partiye komitéti teri'ipidin jenubtiki sheher-rayonlargha teqsimlinidiken.

Uyghurlar topliship olturaqlashqan jenubtiki sheher we rayonlardiki orunlargha iltimas qilghuchilarning wezipige olturghandin kéyin dawalash we toluqlima pulidin toluq behrimen bolidighanliqi yézilghan bolup, téximu köp ilitimas qilghuchilar jenubtiki sheher we rayonlargha bérishqa dewet qilin'ghan.

Radiyomiz xitayche bölümining xewer qilishiche, yéqinda xitaydiki ijtima'iy taratqularda ichkiri ölkilerdin Uyghur élige köchüp bérip olturaqliship qalghan xitaylar teminlinidighan alahide imtiyazlar heqqide yollanmilar köpeygen.

Közetküchiler xitay hökümitining Uyghurlar zich olturaqlashqan rayonidiki orunlargha her xil shekilde köplep xitay köchmenlirini orunlashturushi Uyghurlarni pütünley kontrol astigha élishni meqset qilidu, dep qarashmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet