Bingtu'en organlirining pewqul'adde küchiyishi diqqet qozghimaqta

Xitay axbaratlirining bingtu'en heqqidiki xewerliri Uyghur rayonidiki bu organning barghanche tereqqiy qiliwatqanliqini körsetmekte.

Xitayning “Bingtu'en xewerliri” torida, bingtu'enning 1981-yil eslige keltürülüshi munasiwiti bilen bir medhiye maqalisi élan qilin'ghan bolup, bingtu'enning “Shanliq tarixi we ghayet zor muweppeqiyetliri” tonushturulghan. Bingtu'en 1954-yil xitay génrali wang jénining bashchiliqida qurulghan bolup, eng deslepte “Xitay xelqi azadliq armiyesi shinjang herbiy rayoni ishlepchiqirish-qurulush bingtu'eni” dep atalghan. 1975-Yil bikar qilin'ghan bolsimu, 1981-yil wang jénining qayta-qayta iltimas sunushi bilen déng shyawping uni eslige keltürgen. Shuningdin kéyin bingtu'en burunqi baziliri asasida tereqqiy qilip, süyi mol, tupriqi munbet jaylarni bir-birlep yutuwélishqa bashlighan we bügünki künde yéza igilik bilen sana'et birleshken ghayet zor herbiy, iqtisadiy we memuriy gewdige aylan'ghan.

Ötkenki xewirimizde bingtu'enning yerlik orunlar bilen dawalinish sughurtisi qatarliq sahelerde bir gewdilishishke qarap mangghanliqidin uchur bergeniduq. Yéqinda chiqqan xewerdin melum bolushiche, xitay hökümiti “Bingtu'en namratlarni yölesh tereqqiyat ishxanisi” ni özgertip, “Bingtu'en yézilarni güllendürüsh idarisi” qilip qurup chiqqan. Xitay axbaratlirining tonushturushigha qarighanda, bu idare bingtu'enning nazaret derijilik memuriy ornigha östürülgen bolup, bingtu'en yéziliri we yéza igilik idarisi teripidin bashqurulidiken, asasliq wezipisi “Namratliq qutulush xizmitide qolgha kelgen netijilerni qoghdash, yézilarni güllendürüsh istratégiyesige da'ir konkrét xizmetlerni bir tutash emeliyleshtürüsh” iken.

Közetchilerning bildürüshiche, bingtu'enning qurulushidin tartip bügünki tereqqiyatighiche nezer salghanda, kommunist xitay uni Uyghur rayonini tutup turushning eng muhim halqisi hésablap, köz qarichuqidek asrap, chong qilip bügünkidek halgha élip kelgen. Xitayning tebiri boyiche éytqanda, “Bingtu'en xalighanda déhqan, xalighanda esker bolalaydighan alahide qoshun bazisi, chégra rayonni qoghdashning mustehkem qel'esi” bolup, Uyghur rayonini tutup turushning kapaliti hésablinidiken, shunga xitay hökümiti her qaysi tarixiy dewrlerde meyli qandaq bedel tölishidin qet'iynezer bingtu'enni saqlap qalghan we tereqqiy qildurup kelgen.