Биңтуән органлириниң пәвқуладдә күчийиши диққәт қозғимақта

Мухбиримиз җәвлан
2021-06-02
Share

Хитай ахбаратлириниң биңтуән һәққидики хәвәрлири уйғур районидики бу органниң барғанчә тәрәққий қиливатқанлиқини көрсәтмәктә.

Хитайниң "биңтуән хәвәрлири" торида, биңтуәнниң 1981-йил әслигә кәлтүрүлүши мунасивити билән бир мәдһийә мақалиси елан қилинған болуп, биңтуәнниң "шанлиқ тарихи вә ғайәт зор мувәппәқийәтлири" тонуштурулған. Биңтуән 1954-йил хитай генрали ваң җениниң башчилиқида қурулған болуп, әң дәсләптә "хитай хәлқи азадлиқ армийәси шинҗаң һәрбий райони ишләпчиқириш-қурулуш биңтуәни" дәп аталған. 1975-Йил бикар қилинған болсиму, 1981-йил ваң җениниң қайта-қайта илтимас сунуши билән дең шявпиң уни әслигә кәлтүргән. Шуниңдин кейин биңтуән бурунқи базилири асасида тәрәққий қилип, сүйи мол, туприқи мунбәт җайларни бир-бирләп ютувелишқа башлиған вә бүгүнки күндә йеза игилик билән санаәт бирләшкән ғайәт зор һәрбий, иқтисадий вә мәмурий гәвдигә айланған.

Өткәнки хәвиримиздә биңтуәнниң йәрлик орунлар билән давалиниш суғуртиси қатарлиқ саһәләрдә бир гәвдилишишкә қарап маңғанлиқидин учур бәргәнидуқ. Йеқинда чиққан хәвәрдин мәлум болушичә, хитай һөкүмити "биңтуән намратларни йөләш тәрәққият ишханиси" ни өзгәртип, "биңтуән йезиларни гүлләндүрүш идариси" қилип қуруп чиққан. Хитай ахбаратлириниң тонуштурушиға қариғанда, бу идарә биңтуәнниң назарәт дәриҗилик мәмурий орниға өстүрүлгән болуп, биңтуән йезилири вә йеза игилик идариси тәрипидин башқурулидикән, асаслиқ вәзиписи "намратлиқ қутулуш хизмитидә қолға кәлгән нәтиҗиләрни қоғдаш, йезиларни гүлләндүрүш истратегийәсигә даир конкрет хизмәтләрни бир туташ әмәлийләштүрүш" икән.

Көзәтчиләрниң билдүрүшичә, биңтуәнниң қурулушидин тартип бүгүнки тәрәққиятиғичә нәзәр салғанда, коммунист хитай уни уйғур районини тутуп турушниң әң муһим һалқиси һесаблап, көз қаричуқидәк асрап, чоң қилип бүгүнкидәк һалға елип кәлгән. Хитайниң тәбири бойичә ейтқанда, "биңтуән халиғанда деһқан, халиғанда әскәр болалайдиған алаһидә қошун базиси, чегра районни қоғдашниң мустәһкәм қәләси" болуп, уйғур районини тутуп турушниң капалити һесаблинидикән, шуңа хитай һөкүмити һәр қайси тарихий дәврләрдә мәйли қандақ бәдәл төлишидин қәтийнәзәр биңтуәнни сақлап қалған вә тәрәққий қилдуруп кәлгән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт