Xitay hökümitining bingtu'en rayonlirigha téxnikiliq yardem bérishi guman qozghimaqta

“Xitay xewerliri tori” ning 8-awghusttiki xewiride éytilishiche, xitay merkiziy hökümiti yéqinda 11 milyon som meblegh ajritip bingtu'endiki “Üch rayon” gha pen-téxnika xadimlirini seplep béridighanliqini élan qilghan. Xewerde éytilishiche, bu meblegh arqiliq xitay hökümiti 512 neper pen-téxnika xadimini shixenze uniwérsitéti, tarim uniwérsitéti qatarliq jaylardin tallap, bingtu'enlerge téxnikiliq yardem bérishke ewetidiken. Shundaqla bu uniwérsitétlarda bingtu'endin kelgen 60 xitayni terbiyeleydiken.

Xitay hökümiti xitay mutexessislirini yuqiri ma'ash bilen Uyghurlar ahalining mutleq köp qismini teshkilleydighan jaygha “Téxnikiliq yardem” ge ewetishni izchil halda “Uyghurlargha yardem” dégen shekilde teshwiq qilip kéliwatqanliqi melum. Mushu shekilde xitay hökümiti bingtu'enlerning pen-téxnika türi üchün 2018-yilining özidila 300 milyon somdin artuq xirajet ajratqan.

Analizchilar bu heqte pikir qilip “Xitay hökümiti Uyghurlargha yardem qilish namida özining xitay xizmetchilirini asasiy qatlamlarda yétekchi orunda turghuzup kéliwatidu. Bu arqiliq Uyghurlarni kontrol qilishni yenimu kücheytish ularning axirqi meqsiti,” dep körsetti.