Xitay hökümiti Uyghur élida bingtu'en bilen yerlikni birleshtürüsh herikiti bashlighan

Yéqindin buyan xitay hökümitining Uyghur élida bbingtu'en bilen yerlikni birleshtürüshtin ibaret siyasiy istratégiyelik pilanini emeliyleshtürüwatqanliqi melum.

Xitayning “Tengritagh tori” élan qilghan bir xewerde éytilishiche, bingtu'en 3-diwiziyisi jaylashqan tumshuq shehiri bingtu'en we yerlikning bir gewdilishishini téximu ilgiri sürüsh üchün yéqinqi yillardin buyan tumshuq shehiri etrapidiki rayonlar bilen birliship, bir gewdilishish tereqqiyat istratégiyesini yolgha qoyghan.

Xewerge qarighanda bu bingtu'en bilen yerlikning birlishishi bashqurushta birlishish, iqtisadta birlishish, ul eslihede birlishish, yer – zéminda birlishish, ma'aripta birlishish qatarliqlarni asas qilidiken.

Bingtu'enning mu'awin qomandani shé rüyyüen bu heqte söz qilghanda: “Peqet bingtu'en bilen yerlikni bir gewdileshtürgendila, andin zor tereqqiyatqa érishkili hemde shinjangdiki ijtima'iy muqimliq we uzun muddetlik eminlikning omumiy weziyitige téximu yaxshi maslashqili bolidu,” dégen.

Chet ellerdiki Uyghur közetküchilerning qarishiche, bingtu'en bilen yerlikni birleshtürüsh pilani xitay merkizi hökümitining Uyghur élidiki nahayiti zor siyaset özgirishidin dérek béridighan bolup, bu xitayning bingtu'endin ibaret gheyriy resmiy armiyesining Uyghur élidiki qamalini yenimu kücheytishni meqset qilidiken.