Ishlepchiqirish-qurulush bingtu'eni "Gherbiy rayon pilani" arqiliq yenimu köp xitay köchmenlirini Uyghur éligha qobul qilmaqtiken

Muxbirimiz irade
2020-12-17
Share

Xitayning Uyghur élida turushluq ishlepchiqirish-qurulush bingtu'eni Uyghur rayonigha xitay köchmenlirini yötkeshni dawamliq kücheytmekte.

"Bingtu'en géziti" ning 16-dékabir tarqatqan xewiridin melum bolushiche, bingtu'en "13-Besh yilliq pilan" mezgilide "Gherbiy rayon pilani" dep atalghan bir siyaset boyiche xitay ölkiliridin jem'iy 6886 neper aliy mektep oqughuchisini bingtu'en'ge qobul qilghan iken.

Xewerde éytilishiche, bu pilan xitay hökümiti Uyghur élidiki bingtu'en'ge kélip orunlishidighan xitay köchmenlerni yenimu köpeytish üchün yolgha qoyghan mexsus istratigiyesi iken. Ular yenimu köp xitay köchmenlirini jelp qilish meqsitide 2018-yili 8-aydin bashlap, xitay ölkiliridin kélidighan atalmish "Pida'iy" larning xizmet we turmush yardem pulini zor derijide ashurghan iken.

Xewerde yene mundaq diyilgen: "Uniwérsitét oqughuchilirining gherbiy rayonda xizmet qilishi teshebbus qilin'ghan 'gherbiy rayon pilani' yolgha qoyulghandin yolgha qoyulghandin buyan, bingtu'en 13 ming 684 pida'iy qobul qildi, buning ichide 4152 kishi shinjangda qélip yerleshti. Shenshi ölkisi bawji shehiridin kelgen sey denméy pida'iy bolup sekkizinchi diwiziye 142-polkida ishligendin kéyin, bu yerde yiltiz tartishni tallidi."

Xitay hökümiti yillardin buyan herxil nam, herxil siyasetler boyiche Uyghur éligha toxtimay xitay köchmenlirini yötkewatqan bolup, bingtu'en bu siyasetlerde dawamliq bashlamchiliq rol oynap kelgen. Bolupmu 2017-yili xitay milyonlighan Uyghurni lagérlargha qamighandin buyan bu herikitini yenimu tézletken.

Derweqe, yuqiriqi bu "Gherbiy rayon pilani" dep atalghan köchmen yötkesh pilanini xitay kommunistik yashlar ittipaqi merkiziy komitéti, xitay ma'arip ministirliqi, maliye ministirliqi, adem küchi bayliqi we ijtima'iy kapalet ministirliqi birlikte yolgha qoyghan iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet