Bingtu'enning Uyghur mejburiy emgikige chétishliq paxta mehsulatlirining amérika bazirida dawamliq sétiliwatqanliqi ilgiri sürülmekte

Muxbirimiz irade
2021-08-12
Share

Amérikaning xitay hökümiti Uyghurlargha qaritiwatqan mejburiy emgekni ayaqlashturush üchün körsitiwatqan tirishchanliqlirigha qarimay, Uyghur élidiki bingtu'en teripidin ishlepchiqirilghan paxtilarni menbe qilghan bir qisim mehsulatlarning yenila amérika bzarlirida sétiliwatqanliqi melum.

Washin'gtondiki aqillar ambiri bolghan "Ilghar mudapiye tetqiqat merkizi" teripidin élan qilin'ghan doklatta körsitilishiche, amérikadiki Target ,Walmart qatarliq chong tiptiki parche sétish dukanlirida mushu xildiki paxta mehsulatliri bar iken. Bu heqtiki doklatning aptori irina buxarin "Menbe" zhorniligha mundaq dégen: "Tehlilimiz shuni ispatlidiki, shinjangdiki Uyghurlarni xorlash yenila yer shari soda we pul-mu'amile sahesige keng kölemde baghlinishliq bolup qalghan. U moda sana'itigimu kéngeygen".

Buxarinning izahlishiche, adette bir mehsulatning bir qanche wastichi teminligüchilerdin ötüshi u mehsulatning kélish menbesini éniqlashqa tosalghu boluwatqan bolup, bu amérikaning bingtu'ende ishlepchiqirilghan paxta mehsulatlirigha qoyghan cheklimisining ünümini chüshürmektiken.

Doklatta körsitilishiche, shyamén xelq'ara soda guruhi shirkiti öz tor bétide bingtu'enning paxta mehsulatlirini satidighanliqini ochuq-ashkara bazargha salidighan bolup, uning mehsulatlirini amérikadiki JCPenney ,Macy's ,Kohl we Target qatarliq parche satquchi dukanlargha mal teminleydighan MMI toqumichiliq shirkitige az dégende ikki qétim mal salghan iken.

MMI Toqumichiliq sana'iti shyaméndiki soda guruhi bilen axirqi qétim 2019-yili 1-ayda sodisini ayaqlashturghanliqini ilgiri sürgen.

Tetqiqatchi buxarinning diyishiche, bingtu'enning dunya bilen bolghan alaqisining murekkepliki alaqidar tereplerning teminlesh zenjirining Uyghur élidiki zulum bilen baghlinishi bar-yoqliqini chüshinishini qéyinlashturuwatqan bolup, bu Uyghur élidin biwasite paxta sétiwalmasliqning zulumni toxtitish üchün yéterlik emeslikini namayen qilip béridiken.

U buning üchün parche satquchilarning yaki amérikadiki teminligüchilerning mehsulatning kélish menbesini tekshürüshni chongqurlashturushi, teminligüchilerning ochuq-ashkara bolushini telep qilishi kéreklikini éytqan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet