Хитай һөкүмити «шинҗаң ишләпчиқириш-қурулуш биңтуәни» ни давамлиқ күчәйтмәктә

Мухбиримиз әркин
2019-03-08
Елхәт
Пикир
Share
Принт

Хитай мәркизи һөкүмити өзиниң уйғур аптоном районидики йерим ишләпчиқириш йерим һәрбий тәшкилати - биңтуәнни етибар бериш, һоқуқ даирисини кеңәйтиш вә малийә ярдимини көпәйтиш қатарлиқ васитиләр арқилиқ давамлиқ күчәйтмәктә. Көзәткүчиләр илгири хитай даирилириниң биңтуәнни күчәйтиши районда параллел дөләт фонкисийәсини шәкилләндүрүп, уйғур аптоном райониниң муқимлиқиға зор тәһдит пәйда қилидиғанлиқини агаһландуруп кәлгән. Лекин хитай һөкүмити биңтуәнни уйғурларға тақабил турушниң һалқилиқ қорали, дәп қарап, бу хил агаһландурушларға қулақ салмай кәлди.

Йеқинда хитай мәркизи һөкүмитиниң өткән йили биңтуәнгә униң деһқанчилиқ игиликини қоллаш вә қоғдаш характерлик 180 милйон йүән ярдәм пули аҗратқанлиқи ашкариланди. «Җуңго хәвәрлири» ториниң ашкарилишичә, бу пул нуқтилиқ биңтуәнниң ашлиқ ишләпчиқиришни көләмләштүрүши, қәрз пул өсүмини қайтуруши, техника йеңилиши вә иҗтимаийлашқан деһқанчилиқ мулазимәт системиси қурулуши қатарлиқ 4 саһәгә сәрп қилинған. Тәнқидчиләр, биңтуәнгә берилгән бу хил ярдәм йеза игилик ишләпчиқиришида адаләтсиз риқабәт муһити яритип, йәрликниң деһқанчилиқ риқабәт күчини зор дәриҗидә аҗизлаштуруватқанлиқини илгири сүрмәктә. 

«Җуңго хәвәрлири» ториниң хәвәр қилишичә, мәркизи һөкүмәтниң ярдимидә өткән йили биңтуәнниң ашлиқ ишләпчиқириши, 1.9 Пирсәнт, пахта ишләпчиқириши 7.20 Пирсәнт артқан. Бу, уйғур аптоном райониниң 2018‏-йиллиқ омуми пахта мәһсулатиниң 40 пирсәнтини, хитайниң омуми пахта мәһсулатиниң 5.33 Пирсәнтини игилигән. Көзәткүчиләрниң илгири сүрүшичә, хитай һөкүмити биңтуәнниң деһқанчилиқ ишлириға ярдәм бәргән болсиму, лекин униң уйғурларни кәң көләмлик тутқун қилип, лагерларға қамиши уйғур деһқанчилиқини вәйранчилиққа учратқан.

Пикирләр (0)
Share
Толуқ бәт