Xitay hökümiti "Shinjang ishlepchiqirish-qurulush bingtu'eni" ni dawamliq kücheytmekte

Muxbirimiz erkin
2019-03-08
Élxet
Pikir
Share
Print

Xitay merkizi hökümiti özining Uyghur aptonom rayonidiki yérim ishlepchiqirish yérim herbiy teshkilati - bingtu'enni étibar bérish, hoquq da'irisini kéngeytish we maliye yardimini köpeytish qatarliq wasitiler arqiliq dawamliq kücheytmekte. Közetküchiler ilgiri xitay da'irilirining bingtu'enni kücheytishi rayonda parallél dölet fonkisiyesini shekillendürüp, Uyghur aptonom rayonining muqimliqigha zor tehdit peyda qilidighanliqini agahlandurup kelgen. Lékin xitay hökümiti bingtu'enni Uyghurlargha taqabil turushning halqiliq qorali, dep qarap, bu xil agahlandurushlargha qulaq salmay keldi.

Yéqinda xitay merkizi hökümitining ötken yili bingtu'en'ge uning déhqanchiliq igilikini qollash we qoghdash xaraktérlik 180 milyon yüen yardem puli ajratqanliqi ashkarilandi. "Junggo xewerliri" torining ashkarilishiche, bu pul nuqtiliq bingtu'enning ashliq ishlepchiqirishni kölemleshtürüshi, qerz pul ösümini qayturushi, téxnika yéngilishi we ijtima'iylashqan déhqanchiliq mulazimet sistémisi qurulushi qatarliq 4 sahege serp qilin'ghan. Tenqidchiler, bingtu'en'ge bérilgen bu xil yardem yéza igilik ishlepchiqirishida adaletsiz riqabet muhiti yaritip, yerlikning déhqanchiliq riqabet küchini zor derijide ajizlashturuwatqanliqini ilgiri sürmekte. 

"Junggo xewerliri" torining xewer qilishiche, merkizi hökümetning yardimide ötken yili bingtu'enning ashliq ishlepchiqirishi, 1.9 Pirsent, paxta ishlepchiqirishi 7.20 Pirsent artqan. Bu, Uyghur aptonom rayonining 2018‏-yilliq omumi paxta mehsulatining 40 pirsentini, xitayning omumi paxta mehsulatining 5.33 Pirsentini igiligen. Közetküchilerning ilgiri sürüshiche, xitay hökümiti bingtu'enning déhqanchiliq ishlirigha yardem bergen bolsimu, lékin uning Uyghurlarni keng kölemlik tutqun qilip, lagérlargha qamishi Uyghur déhqanchiliqini weyranchiliqqa uchratqan.

Toluq bet