Бу йилниң 1-пәсилдә 20 миңға йеқин киши биңтуәндә ишқа орунлашқан

Вашингтондин мухбиримиз әзиз тәйярлиди
2024.05.14

Хитай һөкүмити башқурушидики “шинхуа агентлиқи” ниң 13-майдики хәвиридә ейтилишичә, биңтуән адәм күчи байлиқи вә иҗтимаий капаләт идариси алдинқи пәсилдә 19 миң 800 кишини хизмәткә орунлаштурған болуп, бу һал алдинқи пәсилгә селиштурғанда 7.7 Пирсәнт ашқан. Шуниңдәк бу хилдики ишқа орунлаштурушниң муқим давам қиливатқанлиқи көрситилгән.

Хәвәрдә ейтилишичә, биңтуән системиси йеқинқи йилларда ишқа орунлаштурушта көплигән етибар бериш сиясәтлирини иҗра қилип келиватқан болуп, “ишқа орунлаштуруш йоллирини кеңәйтиш” буниңдики муһим чариләрниң бири болуп кәлгән. “биңтуән хәвәрлири” ниң бу һәқтики хәвиридә ейтилишичә, биңтуәнниң һәрқайси девизийәлиридики шәһәрләргә җайлашқан йүзгә йеқин ширкәт 1-май күниниң өзидила миңдин артуқ киши билән хизмәт тохтами түзгән. Болупму алий мәктәпни пүттүргәнләрниң буниңда асасий орунни игилигәнлики алаһидә әскәртилгән.

Изчил түрдә “дөләт ичидики дөләт” дәп атилип келиватқан биңтуән системиси 1954-йилидин башлап хитай көчмәнлирини асас қилған һалда кеңийип келиватқанлиқи мәлум. Биңтуәнниң “аптоном район” қурулмисини контрол қили вә хитай һөкүмитиниң уйғур дияридики мутләқ һөкүмранлиқиға капаләтлик қилиш мәқситидә тәсис қилинған сиясий гәвдә икәнлики алекса олесен (Alexa Olesen), бесаний ибраһимян (Ebrahimian Bethany) қатарлиқ мутәхәссисләрниң баянлирида көп қетим тилған елинған иди. Бу һал “уйғур кишилик һоқуқ қурулуши” 2020-йили авғустта елан қилған “биңтуән һәққидики бәш сават” намлиқ доклатта техиму тәпсилий шәрһлинип, биңтуән системисиниң мустәмликичилик һөкүмранлиқни вә уйғур мәҗбурий әмгикини иҗра қилғучи әң муһим күчләрдин икәнлики көрситип берилгән иди.

Йеқинқи йилларда болса биңтуән системисиниң уйғур қирғинчилиқини иҗра қилиштики әң асаслиқ күч болуп кәлгәнлики ашкара болуп, америка һөкүмити биңтуән системисиға қарита охшимиған җаза тәдбирлирини иҗра қилғаниди.

Нөвәттә хитайдики иқтисадий чекиниш вә ишсизлиқ вәһимисиниң ешип беришиға әгишип миңлиған хитай яшлири уйғур дияридики биңтуән системиси тәмин әткән юқири маашлиқ хизмәт пурсәтлирини таллашқа башлиғанлиқи мәлум. Бу һал өз нөвитидә биңтуәнни техиму кеңәйтишкә хизмәт қилиду, дәп қаралмақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.