Хитайдики биодезил ишләпчиқарғучилар йеңи експорт йоллирини тепишқа урунмақта

Ройтерс агентлиқиниң 16-авғусттики хәвиридә ейтилишичә, хитайдики биодезил (biodiesel) ишләпчиқарғучи ширкәтләрниң мәһсулатлири үчүн әң чоң базар болған явропа иттипақи нөвәттә “төкмә қилип сетишқа қарши туруш беҗи” ни қаттиқ қоллуқ билән иҗра қилишқа башлиған. Буниң билән биодезил ишләпчиқарғучиларниң мәһсулатлири зор миқдарда бесилип қалған һәмдә асия тәвәсидә йеңи експорт йоллирини ечишниң койиға чүшкән.

Хәвәрдә ейтилишичә, явропа иттипақи “төкмә қилип сетишқа қарши туруш беҗи” ниң миқдарини 12 пирсәнттин 36 пирсәнткичә өстүридиғанлиқини елан қилған болуп, бу һал җеҗяң вә хенәндики явропаға биодезил експорт қиливатқан ширкәтләр үчүнла икки милярд америка доллирилиқ йиллиқ содиниң өлидиғанлиқидин бешарәт бәргән. Чүнки явропа иттипақи импорт қиливатқан биодезилниң мутләқ көп қисми хитайдин келидиған болуп, 2023-йилиниң өзидила 1.8 Тонна биодезил импорт қилинған. Шундақ болғанлиқи үчүн хитайда йеқинқи мәзгилләрдә биодезил ишләпчиқарғучи завутлар шиддәт билән көпәйгән.

Хәвәрдә алаһидә әскәртилгән бир нуқта хитайдики көплигән биодезил ишләпчиқарғучи ширкәтләрниң хусусийлар маңдуруватқан кичик көләмдики завутлар икәнлики, уларниң асаслиқ хам әшя мәнбәсиниң хитайдики милйонларчә ресторан вә ашханилардин топланған қалдуқ тамақларни сүзүштин келидиғанлиқи болған.

Мәлум болушичә, биодезил адәттә бийологийәлик усулда ишләпчиқирилидиған дезил болуп, көп хил дизел моторлуқ үскүниләргә вә аптомобилларға йеқилғу үчүн ишлитилиду.