Xitaydiki bi'odézil ishlepchiqarghuchilar yéngi éksport yollirini tépishqa urunmaqta

• Washin'gtondin muxbirimiz eziz teyyarlidi
  2024-08-16

Roytérs agéntliqining 16-awghusttiki xewiride éytilishiche, xitaydiki bi'odézil (biodiesel) ishlepchiqarghuchi shirketlerning mehsulatliri üchün eng chong bazar bolghan yawropa ittipaqi nöwette “Tökme qilip sétishqa qarshi turush béji” ni qattiq qolluq bilen ijra qilishqa bashlighan. Buning bilen bi'odézil ishlepchiqarghuchilarning mehsulatliri zor miqdarda bésilip qalghan hemde asiya teweside yéngi éksport yollirini échishning koyigha chüshken.

Xewerde éytilishiche, yawropa ittipaqi “Tökme qilip sétishqa qarshi turush béji” ning miqdarini 12 pirsenttin 36 pirsentkiche östüridighanliqini élan qilghan bolup, bu hal jéjyang we xénendiki yawropagha bi'odézil éksport qiliwatqan shirketler üchünla ikki milyard amérika dolliriliq yilliq sodining ölidighanliqidin bésharet bergen. Chünki yawropa ittipaqi import qiliwatqan bi'odézilning mutleq köp qismi xitaydin kélidighan bolup, 2023-yilining özidila 1.8 Tonna bi'odézil import qilin'ghan. Shundaq bolghanliqi üchün xitayda yéqinqi mezgillerde bi'odézil ishlepchiqarghuchi zawutlar shiddet bilen köpeygen.

Xewerde alahide eskertilgen bir nuqta xitaydiki köpligen bi'odézil ishlepchiqarghuchi shirketlerning xususiylar mangduruwatqan kichik kölemdiki zawutlar ikenliki, ularning asasliq xam eshya menbesining xitaydiki milyonlarche réstoran we ashxanilardin toplan'ghan qalduq tamaqlarni süzüshtin kélidighanliqi bolghan.

Melum bolushiche, bi'odézil adette biyologiyelik usulda ishlepchiqirilidighan dézil bolup, köp xil dizél motorluq üskünilerge we aptomobillargha yéqilghu üchün ishlitilidu.