Америка хитайниң «бир йол бир бәлбағ» йиғиниға қатнашмайдиғанлиқини елан қилди

Мухбиримиз шөһрәт һошур
2019-04-03
Елхәт
Пикир
Share
Принт

Америка мушу айниң ахири бейҗиңда ечилмақчи болған «бир йол бир бәлбағ» йиғиниға қатнашмайдиғанлиқини елан қилди.


Хитай тәрәп шәнбә күнидики баянатида бу йиғинға 40 қа йеқин дөләтниң вәкиллири қатнишидиғанлиқини елан қилған иди. Америка ташқий ишлар министерлиқиниң баянатчиси роберт палладино сәйшәнбә күни ройтерс агентлиқиниң бу һәқтики соалиға җавабән қилған сөзидә хитай тәрәпниң «бир йол бир бәлбағ» қурулушиға алақидар пилан вә иҗраатлириниң чүшиниксизлики, хәлқаравий өлчәмләргә уйғун әмәслики, болупму ортақ тәрәққият пиринсиплириға хилап икәнликини әскәрткән. Андин «биз бу йиғинға юқири дәриҗлик әмәлдар әвәтмәймиз,» дегән. Хитайни бу һәқтә изаһат беришкә көп қетим чақирғанлиқини тилға алған роберт палладино бу чақириқни буниңдин кейинму тәкрарлайдиғанлиқини билдүргән.

Мәлум болушичә, бу йиғинға дәвәт қилинғанлардин һазирға қәдәр русийә президенти виладимир путин, пакистан баш министири имран хан, филлиппин презденти родриго дутерто вә камбоджа баш министири хунсен өзлириниң қатнишалайдиғанлиқини елан қилған. Ройтерс агентлиқи бүгүнки хәвиридә йәнә әһвалдин хәвәрдар кишиләрниң баянлириға асасән америка тәрәпниң бу йиғинни көзитиш үчүнла төвән дәриҗилик бир хадим әвәтишни ойлишиватқанлиқини әскәрткән.

«Вол-стрет жорнили» гезитиниң бүгүнки бу һәқтики хәвиридә йезилишичә, хитайниң «бир йол бир бәлбағ» қурулуши хитайниң әң қизғин қоллиғучиси нолған пакистанда ақсашқа дуч кәлгән. Пакистандики иқтисадий кризис сәвәбидин мәзку қурулушниң 62 милярд доллар қиммитидики түрлириниң йерими дегүдәк қурулуштин тохтиған. Буниңға бу қурулушни елип бериватқан хитай дөләт ширкәтлириниң пакистан тәрәптин қәррзни қайтуруш һәққидә капаләтнамә тәләп қилиши сәвәб болған.


Пикирләр (0)
Share
Толуқ бәт