Дуня уйғур қурултийи 27‏-апрел өткүзүлгән бирюсселдики намайишиниң “ғәлибилик” болғанлиқини елан қилди

Мухбиримиз әркин
2018.05.01
Share on WhatsApp
Share on WhatsApp

Дуня уйғур қурултийи баянат елан қилип, 27‏-апрел күни белгийә пайтәхти бирюсселда өткүзүлгән зор көләмлик намайишниң “ғәлибилик” елип берилғанлиқини елан қилди. Д у қ баянатида, бирюсселдики намайишни “муһаҗирәттики уйғурларниң әң зор көләмлик йиғилишлириниң бири” дәп көрситип, у уйғур “һәрикитиниң изчиллиқидики бир бөлүнүш нуқтиси” икәнликини тәкитлигән.

27‏-Апрел һәр қайси әлләрдин кәлгән бир қанчә миң уйғур намайишчи явропа комиссийисиниң алдида топлинип, хитайниң уйғур районидики “йепиқ тәрбийиләш лагерлири” ни тақашни, бу лагерлардики бир милйондәк уйғурни қоюп беришни тәләп қилған шуниңдәк явропа кеңиши вә явропа комиссийисиниң бу ишқа арилишишини тәләп қилған иди. 

Дуня уйғур қурултийи баянатида, қурултай рәиси долқун әйсаниң сөзи нәқил кәлтүрүлүп, “бу намайиш пәқәт бир башлиништур. У уйғур хәлқиниң тамамән ойғанғанлиқи вә иттипақлашқанлиқини көрситип бәрди” дейилгән. Баянатта йәнә, хәлқара җәмийәткә йәнә бир қетим чақириқ қилинип, “биз бу йәрдин явропа иттипақи, б д т, америка вә хәлқара җәмийәтни бир милйондәк уйғурниң хитай дарлири тәрипидин қанунсиз тутуп турулуш мәсилисини оттуриға қоюшқа чақиримиз” дегән. Баянатта йәнә “хитайғиму шу ениқ сигнални беримиз, сән уйғурларни қанчилик қаттиқ бастурсаңму, лекин бизниң әркинлик, демократийә вә кишилик һоқуқ роһимизни сундуралмайсән”.

27‏-Апирилдики намайиш җәрянида дуня уйғур қурултийиниң мәсуллири явропа комиссийиси, явропа иттипақи ташқи ишлар комиссариятиниң юқири дәриҗилик әмәлдарлири билән көрүшүп, уларға “йепиқ тәрбийиләш лагерлири” ға даир бир әрзнамә сунған һәм бу лагерларда йүз бериватқан ишларни тонуштурған. явропа комиссийиси вә явропа ташқи ишлар комиссариятидики әмәлдарларниң уйғур вәкиллиригә қандақ җаваб бәргәнлики мәлум әмәс. Лекин, дуня уйғур қурултийи баянатида, уйғур рәһбәрлириниң “явропа иттипақини конкрет тәдбир қоллинип, бу зор көләмлик кишилик һоқуқ бузғунчилиқиға хатимә беришини тәләп қилғанлиқи” ни билдүргән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.